ធ្វើ​ជា​ប្រធាន​តុលាការ​បែរជា​ប្រើប្រាស់​យានជំនិះ​ពាក់​ស្លាក​លេខ​ទីស្តីការគណៈរដ្ឋមន្ត្រី​ទៅ​វិញ​

11/26/2013 05:01:00 AM

មានរឿងគួរឲ្យចាប់អារម្មណ៍ និងហួសចិត្តមួយ ដែលឯកឧត្តមបណ្ឌិត ជីវ កេង ក្នុងនាមជាប្រធានតុលាការសាលាដំបូងរាជធានីភ្នំពេញ ជាសមាជិកឧត្តមក្រុមប្រឹក្សានៃអង្គចៅក្រម និងជាប្រធានអង្គភាពអធិការកិច្ចនៃក្រុមប្រឹក្សាវិន័យនៃឧត្តមក្រុមប្រឹក្សានៃអង្គចៅក្រម "អ.ក.វ" ពោលគឺបម្រើការងារនៅក្នុងស្ថាប័នតុលាការ ដែលរដ្ឋធម្មនុញ្ញជាច្បាប់កំពូលនៃព្រះរាជាណាចក្រកម្ពុជា ចែងតម្រូវឲ្យមានអំណាចឯករាជ្យ បែរជាឯកឧត្តមរូបនេះប្រើប្រាស់យានជំនិះពាក់ស្លាកលេខទីស្តីការគណៈរដ្ឋមន្ត្រី ដែលជាស្ថាប័ននីតិប្រតិបត្តិទៅវិញ ។

រថយន្តទំនើបរបស់ឯកឧត្តមបណ្ឌិត ជីវ កេង ម៉ាក Range Rover ពណ៌ស ពាក់ស្លាកលេខរដ្ឋ05.2-9595 ។

យោងតាមស្មារតីអនុក្រឹត្យរបស់រាជរដ្ឋាភិបាលលេខ៧៧អនក្រ.បក ចុះថ្ងៃទី២៨ ខែវិច្ឆិកា ឆ្នាំ២០០៣ ស្តីពីការចេញស្លាកលេខសម្គាល់យានជំនិះ គឺបានកំណត់ថា ស្លាកលេខយានជំនិះប្រភេទរដ្ឋ 05.2-9595 នេះសម្រាប់រថយន្តជាសម្បត្តិរដ្ឋ ដែលប្រើប្រាស់ដោយទីស្តីការគណៈរដ្ឋមន្ត្រី ។

ឯកឧត្តមបណ្ឌិត ជីវ កេង "ទទួលបានសញ្ញាបត្របណ្ឌិតពីសាកលវិទ្យាល័យចំរើនពហុបច្ចេកវិទ្យារបស់ឯកឧត្តមបណ្ឌិតឧកញ៉ា ជា ចំរើន នាឆ្នាំ២០១១" អាយុ៦២ឆ្នាំ០៨ខែ តែមិនទាន់ត្រូវបានដាក់ឲ្យចូលនិវត្តន៍ក្នុងក្របខ័ណ្ឌចៅក្រមនោះ មានមុខងារនិងតួនាទីកាន់កាប់ច្រើនសំពីងសំពោងណាស់ កាលពីអាណត្តិទី៣ និងអាណត្តិទី៤ របស់រាជរដ្ឋាភិបាលកន្លងមក គឺ ៖

១-ប្រធានសាលាដំបូងរាជធានីភ្នំពេញ "តែងតាំងដោយព្រះរាជក្រឹត្យលេខនស/រកត/១០០៥/៤១៧ ចុះថ្ងៃទី០៧ ខែតុលា ឆ្នាំ២០០៥ ពោលគឺ មានរយៈពេលចំនួន៨ឆ្នាំហើយ" ។

២-សមាជិកឧត្តមក្រុមប្រឹក្សានៃអង្គចៅក្រមក្រោមរូបភាពចាត់តាំង "តែងតាំងដោយព្រះរាជក្រឹត្យនស/រកត/០៨០៧/៣៤០ ចុះថ្ងៃទី០៩ ខែសីហា ឆ្នាំ២០០៧ មានរយៈពេល៦ឆ្នាំហើយ" ។

៣-ទីប្រឹក្សាឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានក្រុមប្រឹក្សាអ្នកច្បាប់នៃទីស្តីការគណៈរដ្ឋមន្ត្រី មានឋានៈស្មើរដ្ឋមន្ត្រី "តែងតាំងសាជាថ្មីដោយព្រះរាជក្រឹត្យលេខនស/រកត/០៥០៩/៥៧១ ចុះថ្ងៃទី២៧ ខែឧសភា ឆ្នាំ២០០៩" ។

៤-សមាជិកក្រុមប្រឹក្សាជាតិប្រឆាំងអំពើពុករលួយ មានឋានៈស្មើរដ្ឋមន្ត្រី "តែងតាំងដោយព្រះរាជក្រឹត្យលេខនស/រកត/០៦១០/៤៩៩ ចុះថ្ងៃទី១២ ខែតុលា ឆ្នាំ២០១០" ។

៥-សមាជិកក្រុមប្រឹក្សាកំណែទម្រង់ច្បាប់និងប្រព័ន្ធយុត្តិធម៌ "តែងតាំងដោយព្រះរាជក្រឹត្យលេខនស/រកត/០៨០៩/៧៦៩ ចុះថ្ងៃទី០១ ខែសីហា ឆ្នាំ២០០៩" ។

៦-សមាជិកក្រុមប្រឹក្សាភិបាលនៃរាជបណ្ឌិត្យសភាវិជ្ជាជីវៈតុលាការ "តែងតាំងដោយអនុក្រឹត្យលេខ៩១អនក្រ.តត ចុះថ្ងៃទី២៧ ខែមករា ឆ្នាំ២០០៩" ។

៧-ប្រធានអង្គភាពអធិការកិច្ចនៃក្រុមប្រឹក្សាវិន័យនៃឧត្តមក្រុមប្រឹក្សានៃអង្គចៅក្រម "តែងតាំងដោយអនុក្រឹត្យលេខ១៤៤អនក្រ.បក ចុះថ្ងៃទី១១ ខែកញ្ញា ឆ្នាំ២០១២" ។

៨-សមាជិកគណៈមេធាវីនៃព្រះរាជាណាចក្រកម្ពុជា មានអត្តលេខ៨៤៨ "ធ្វើសច្ចាប្រណិធានចូលប្រកបវិជ្ជាជីវៈមេធាវីនាថ្ងៃទី០៨ ខែតុលា ឆ្នាំ២០១២" ។

បើអនុលោមតាមព្រះរាជក្រឹត្យលេខនស/រកត/០៩០៥/៤០៣ ចុះថ្ងៃទី០៣ ខែកញ្ញា ឆ្នាំ២០០៥ ត្រង់មាត្រា១ដែលបានចែងថា "ត្រូវបានដាក់ឲ្យចូលនិវត្តន៍ចៅក្រម និងព្រះរាជអាជ្ញាដែលមានអាយុចាប់ពី៦០ឆ្នាំឡើងទៅ" គឺឯកឧត្តម ជីវ កេង ត្រូវដល់អាយុដាក់ឲ្យចូលនិវត្តន៍ហើយ ប៉ុន្តែឯកឧត្តមចៅក្រមរូបនេះត្រូវបានអនុញ្ញាតឲ្យនៅបន្តបម្រើការងារតទៅទៀតដោយព្រះរាជក្រឹត្យលេខនស/រកត/០៧១១/៦៩៤ ចុះថ្ងៃទី២៥ ខែកក្កដា ឆ្នាំ២០១១ ។

មជ្ឈដ្ឋាននានាបានចោទជាសំណួរថា តើឯកឧត្តម ជីវ កេង កំពុងកាន់កាប់មុខតំណែងអ្វីមួយឲ្យពិតប្រាកដ និងមានទំនាក់ទំនងអ្វីនឹងស្ថាប័នទីស្តីការគណៈរដ្ឋមន្ត្រី ដែលជាស្ថាប័ននីតិប្រតិបត្តិ ទើបឯកឧត្តមរូបនេះក្នុងនាមជាមន្ត្រីក្របខ័ណ្ឌចៅក្រមបម្រើការងារក្នុងស្ថាប័នតុលាការជាស្ថាប័នឯករាជ្យពីស្ថាប័ននីតិប្រតិបត្តិ បែរជាប្រើប្រាស់រថយន្តដោយពាក់ស្លាកលេខទីស្តីការគណៈរដ្ឋមន្ត្រីទៅវិញ ? ឬមួយក៏ទំនាក់ទំនងនេះកើតមានដោយសារឯកឧត្តម ជីវ កេង ធ្វើជាទីប្រឹក្សាឯកឧត្តមបណ្ឌិតសភាចារ្យ សុខ អាន ? បើដូច្នេះ មានតែឋានៈជាទីប្រឹក្សាប្រធានក្រុមប្រឹក្សាអ្នកច្បាប់ត្រូវទទួលបានរបបរថយន្តទំនើបម៉ាក Range Rover ហើយពាក់ស្លាកលេខទីស្តីការគណៈរដ្ឋមន្ត្រីឬ ?

ក្រុមអ្នកច្បាប់ឯករាជ្យនៅកម្ពុជា បានលើកឡើងថា ឋានៈនិងតួនាទី ព្រមទាំងអំពើរបស់ឯកឧត្តម ជីវ កេង ដែលធ្វើជាទីប្រឹក្សាឲ្យមន្ត្រីបម្រើការងារក្នុងស្ថាប័ននីតិប្រតិបត្តិ និងប្រើប្រាស់យានយន្តពាក់ស្លាកលេខទីស្តីការគណៈរដ្ឋមន្ត្រីដូច្នេះ គឺឯកឧត្តមរូបនេះបាននិងកំពុងបង្ហាញអំពីរូបភាពនៃការយកអំណាចក្នុងស្ថាប័ននីតិប្រតិបត្តិមកប្រើប្រាស់ដាក់សម្ពាធ ឬគ្របដណ្តប់លើស្ថាប័នតុលាការឲ្យបាត់បង់អំណាចឯករាជ្យរបស់ស្ថាប័ននេះតែម្តង ៕

Source from: www.dtn7.com