អ្នកស្រុក​ចោទ​ថា​ ក្រុមហ៊ុន​ចិន​ដំឡើង​គ្រឿងចក្រ​បូម​យក​រ៉ែ​មាស​នៅ​ទន្លេសេសាន​ខេត្តរតនគិរី​

11/26/2013 05:01:00 AM

ក្រុមហ៊ុនចិនមួយឈ្មោះ ឌីស្កូវរី បាននិងកំពុងដំឡើងគ្រឿងចក្រមួយដ៏ទំនើបនៅក្បែរមាត់ទន្លេសេសាន ឋិតក្នុងភូមិតាវែងលើ ឃុំតាវែង ស្រុកតាវែង ខេត្តរតនគិរី ដោយប្រើប្រាស់អ្នកបច្ចេកទេស និងកម្មករសុទ្ធតែជាជនជាតិចិន ហើយត្រូវបានក្រុមអ្នកស្រុក និងអ្នករកស៊ីបូមខ្សាច់ចោទប្រកាន់ថា ក្រុមហ៊ុនចិននេះដំឡើងគ្រឿងចក្រទំនើបដើម្បីបូមយករ៉ែមាសពីបាតទន្លេសេសាន ខណៈក្រុមអាជ្ញាធរអះអាងថា ក្រុមហ៊ុនចិនេះដំឡើងគ្រឿងចក្រដើម្បីធ្វើសកម្មភាពបូមខ្សាច់យកទៅផ្គត់ផ្គង់ការដ្ឋានសំណង់ទំនប់វារីអគ្គិសនីសេសាន និងសម្រាប់បំពេញតម្រូវការប្រើប្រាស់ក្នុងស្រុក ។

អាជីវកររកស៊ីបូមខ្សាច់ម្នាក់បាននិយាយឲ្យដឹងថា គ្រឿងចក្រដែលក្រុមហ៊ុននេះដំឡើងនៅមាត់ទន្លេសេសាន គឺមិនមែនដើម្បីបូមយកខ្សាច់ទេ តែអាចដើម្បីធ្វើសកម្មភាពបូមយករ៉ែមាសពីបាតទន្លេសេសាន ពីព្រោះទន្លេសេសានមិនសូវសម្បូណ៌ខ្សាច់ឡើយ ។ អាជីវកររូបនេះបាននិយាយបន្តទៀតថា កាលពីប៉ុន្មានឆ្នាំមុននៅទន្លេសេសានចាប់ពីភូមិសាស្ត្រស្រុកតាវែង រហូតដល់ស្រុកវ៉ើនសៃជាប់ព្រំប្រទល់ខេត្តស្ទឹងត្រែង មានប្រជាពលរដ្ឋជាច្រើនគ្រួសារធ្លាប់បានដាក់ញត្តិទៅក្រសួងឧស្សាហកម្ម រ៉ែ និងថាមពល ដើម្បីឲ្យមានវិធានការទប់ស្កាត់សកម្មភាពបូមខ្សាច់ពីអ្នកធ្វើអាជីវកម្មបូមខ្សាច់ ។ ក្រោយមកក្រសួងឧស្សាហកម្ម រ៉ែ និងថាមពល ក៏បានចេញគោលការណ៍មិនអនុញ្ញាតឲ្យមានការធ្វើអាជីវកម្មបូមខ្សាច់នៅទន្លេសេសានទេ ព្រោះនៅបាតទន្លេសេសានមានលោហធាតុរ៉ែមាស ។

លោក មួង ប៉ាន អភិបាលស្រុកតាវែង បានមានប្រសាសន៍ប្រាប់បណ្តាញព័ត៌មានថា ក្រុមហ៊ុនចិនឈ្មោះឌីស្កូវរីនេះទទួលបានលិខិតអនុញ្ញាតពីក្រសួងឧស្សាហកម្ម រ៉ែ និងថាមពល ឲ្យធ្វើការបូមខ្សាច់នៅទីតាំងទន្លេសេសាន ហើយក្រុមហ៊ុនកំពុងដំឡើងគ្រឿងចក្រ គឺមិនទាន់បានធ្វើសកម្មភាពបូមខ្សាច់នៅឡើយ ។

រីឯលោក ហែម វណ្ណថន ប្រធានមន្ទីរឧស្សាហកម្ម រ៉ែ និងថាមពល ខេត្តរតនគិរី បានមានប្រសាសន៍ប្រាប់បណ្តាញព័ត៌មានថា គ្រឿងចក្ររបស់ក្រុមហ៊ុនចិនដែលយកមកដំឡើងនោះ គឺក្រសួងឧស្សាហកម្ម រ៉ែ និងថាមពល អនុញ្ញាតឲ្យបូមខ្សាច់ ដើម្បីយកទៅផ្គត់ផ្គង់សំណង់ទំនប់វារីអគ្គិសនីសេសាន និងបំពេញតម្រូវការប្រើប្រាស់ក្នុងស្រុកផង ។

សេចក្តីរាយការណ៍ផ្សេងទៀត បានឲ្យដឹងថា បច្ចុប្បន្នក្រុមហ៊ុនចិនឈ្មោះឌីស្កូវរីកំពុងតែជ្រួលច្របល់ និងធ្វើការសម្របសម្រួលយ៉ាងសកម្មជាមួយអាជ្ញាធរមូលដ្ឋាន ដែលគេសង្ស័យថា អាចមិនមែនជាគ្រឿងចក្របូមខ្សាច់ឡើយ តែជាគ្រឿងចក្របូមយករ៉ែពីបាតទន្លេសេសានទៅវិញទេ ពីព្រោះបាតទន្លេសេសាននេះសម្បូណ៌ដោយធនធានរ៉ែធម្មជាតិ ។

ពាក់ព័ន្ធនឹងគម្រោងសាងសង់ទំនប់វារីអគ្គិសនីសេសានក្រោម២ ក៏ធ្លាប់បានលេចចេញនូវភាពចម្រូងចម្រាស និងរូបភាពបំផ្លិចបំផ្លាញធនធានធម្មជាតិដែរ ដោយសារមានសកម្មភាពកាប់ឈើយ៉ាងអនាធិបតេយ្យក្នុងតំបន់អាងស្តុកទឹកនៃគម្រោងវារីអគ្គិសនីរបស់ក្រុមហ៊ុន Ang & Associates Lawyer Co.,Ltd. ជាសាខាក្រុមហ៊ុន Royal Group របស់អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាឈ្មួញដ៏មានឥទ្ធិពលបំផុត, ក្រុមហ៊ុនSOKIMEX Group របស់អ្នកឧកញ៉ា សុខ គង់ លើការឈូសឆាយដីក្នុងតំបន់អនុវត្តន៍គម្រោងវារីអគ្គិសនី ទំហំ៣៦.០០០ហិកតា មានតម្លៃនៃការវិនិយោគស្មើនឹងទឹកប្រាក់ចំនួន៨១៦លានដុល្លារអាមេរិកនៅខេត្តស្ទឹងត្រែង និងក្រុមហ៊ុនចិនឈ្មោះ Hydrolancang International Energy ៕