ប្រជាពលរដ្ឋ​ដែល​រាយការណ៍​ពី​សកម្មភាព​កាប់​ឈើ​របស់​ឧកញ៉ា​ ទ្រី​ ភាព​ ត្រូវ​បាន​លោក​ឧកញ៉ា​រូប​នេះ​ប្តឹង​ពី​បទ​បរិហារកេរ្តិ៍​

11/26/2013 05:01:00 AM

ប្រភពព័ត៌មានច្បាស់ការណ៍ពីសាលាដំបូងខេត្តកណ្តាល បានឲ្យដឹងថា ប្រជាពលរដ្ឋដែលរស់នៅក្បែរភូមិគ្រឹះរបស់លោកឧកញ៉ា ទ្រី ភាព អគ្គនាយកក្រុមហ៊ុន MDS ឋិតក្នុងភូមិជន្លង ឃុំត្បែង ស្រុកកណ្តាលស្ទឹង ខេត្តកណ្តាល ចំនួន២នាក់ ដែលបានរាយការណ៍អំពីប្រវត្តិនិងមុខរបររបស់លោកឧកញ៉ា ទ្រី ភាព ហើយត្រូវបានចុះផ្សាយនៅក្នុងរបាយការណ៍របស់ក្រុមកិច្ចការពិសេសសិទ្ធិមនុស្សនៅកម្ពុជា ក្រោមចំណងជើងថា "នយោបាយប្រមូលឈើឲ្យអស់ពីស្រុកខ្មែររបស់ក្រុមហ៊ុនឧកញ៉ា ទ្រី ភាព"នោះ ត្រូវបានលោកឧកញ៉ា ទ្រី ភាព ដាក់ពាក្យបណ្តឹងទៅសាលាដំបូងខេត្តកណ្តាល ប្តឹងចោទប្រកាន់់ពីបទបរិហារកេរ្តិ៍ជាសាធារណៈ។

ដីកាកោះរបស់លោក សំម ឫទ្ធីវាសនា ព្រះរាជអាជ្ញារងអមសាលាដំបូងខេត្តកណ្តាល ចុះថ្ងៃទី២២ ខែវិច្ឆិកា ឆ្នាំ២០១៣ បានបង្គាប់ឲ្យលោក សេន សាន និងអ្នកស្រី អ៊ុក សំបូរ ចូលទៅបំភ្លឺតុលាការ ដើម្បីដោះបន្ទុកនៅថ្ងៃទី២៩ ខែវិច្ឆិកា ឆ្នាំ២០១៣ វេលាម៉ោង០៩ព្រឹក ទាក់ទងនឹងបណ្តឹងរបស់លោកឧកញ៉ា ទ្រី ភាព ។

លោក សេន សាន ដែលជាសកម្មជនគណបក្សសង្គ្រោះជាតិ នៅក្នុងឃុំត្បែង ស្រុកកណ្តាលស្ទឹង ខេត្តកណ្តាល ដែលបានរាយការណ៍អំពីជីវប្រវត្តិ និងមុខរបរលោកឧកញ៉ា ទ្រី ភាព ជូនក្រុមកិច្ចការពិសេសសិទ្ធិមនុស្សនៅកម្ពុជានោះ បានមានប្រសាសន៍ប្រាប់បណ្តាញព័ត៌មានថា "ខ្ញុំមានការភ័យខ្លាចចំពោះដីកានោះ ពីព្រោះម្ចាស់បណ្តឹងគេជាអ្នកមានលុយ និងជាអ្នកមានអំណាច ទោះបីជាខ្ញុំត្រូវក៏គ្មានសង្ឃឹមនឹងឈ្នះគេដែរ ប៉ុន្តែខ្ញុំត្រូវតែចូលខ្លួនតាមដីកាកោះរបស់តុលាការ គឺខ្ញុំមិនគេចវេះទេ" ។

របាយការណ៍ស៊ើបអង្កេតកម្រាស់៥២ទំព័ររបស់ក្រុមកិច្ចការពិសេសសិទ្ធិមនុស្សនៅកម្ពុជា ចេញផ្សាយថ្ងៃទី២០ ខែវិច្ឆិកា ឆ្នាំ២០១៣កន្លងមក បានអះអាងថា ក្រុមហ៊ុនរបស់លោកឧកញ៉ា ទ្រី ភាព ជាក្រុមហ៊ុនដែលមានទំនាក់ទំនងយ៉ាងជិតស្និទ្ធជាមួយរាជរដ្ឋាភិបាល ដែលបានទទួលដីសម្បទានសេដ្ឋកិច្ចជិត៧ម៉ឺនហិកតា តាមរយៈការបំបែកក្រុមហ៊ុនតូចៗចំនួន១៥ គឺជាក្រុមហ៊ុនដែលរកស៊ីនាំឈើទៅក្រៅប្រទេស ជាជាងការវិនិយោគលើដីសម្បទាន ។ ក្រុមហ៊ុនរបស់លោកឧកញ៉ា ទ្រី ភាព បានធ្វើអាជីវកម្មកាប់ឈើ និងដឹកជញ្ជូនឈើប្រណីតនៅគ្រប់តំបន់ព្រៃឈើទូទាំងប្រទេសកម្ពុជា ដែលមាន២៧តំបន់នៃខេត្តចំនួន១២គ្របដណ្តប់ដោយព្រៃឈើ ក្នុងនោះមានគម្រោងអភិវឌ្ឍន៍ និងគម្រោងសម្បទានសេដ្ឋកិច្ច ដោយសារក្រុមហ៊ុននេះមានទំនាក់ទំនងជិតស្និទ្ធជាមួយរាជរដ្ឋាភិបាល និងមានសម្ព័ន្ធមេត្រីភាពជាមួយកម្លាំងប្រដាប់អាវុធ មន្ត្រីបរិស្ថាន មន្ត្រីរដ្ឋបាលព្រៃឈើ មន្ត្រីអភិរក្សក្រសួងឧស្សាហកម្ម រ៉ែ និងថាមពល ក្រសួងកសិកម្ម រុក្ខប្រមាញ់ និងនេសាទ និងក្រុមហ៊ុនភាពីម៉ិច តាមរយៈកិច្ចព្រមព្រៀងស្តីពីការចងសម្ព័ន្ធមេត្រីភាពរវាងក្រុមហ៊ុន មន្ត្រីរាជរដ្ឋាភិបាល និងកងកម្លាំងប្រដាប់អាវុធ ចុះថ្ងៃទី២២ ខែកុម្ភៈ ឆ្នាំ២០១០ ៕