ខេត្តកំពង់ឆ្នាំង៖សាកសពឪពុកនិងកូនត្រូវបានរកឃើញអណ្តែតទឹកដែលបានបាត់ខ្លួនអស់រយៈពេល៣ថ្ងៃមកហើយ ខេត្តកំពង់ឆ្នាំង ៖ សាកសពឪពុកនិងកូន ត្រូវបានរកឃើញអណ្តែតទឹក ដែលបានបាត់ខ្លួន អស់រយៈពេល ៣ ថ្ងៃមកហើយ បន្ទាប់ពីកាណូតរបស់ពួកគេបុកគ្នា ដោយសាកសពជាកូន ត្រូវបានប្រទះឃើញកាលពីវេលាម៉ោង ៧និង៤៥ នាទីព្រឹក និងសាកសពឪពុកត្រូវបាន រកឃើញកាលពីវេលាម៉ោង ១០និង៣០ នាទីព្រឹក ថ្ងៃទី១៥ ខែវិច្ឆិកា ឆ្នាំ២០១៣ ចម្ងាយពីគ្នាជាង ២០០ម៉ែត្រ នៅចំណុចមុខវត្តក្រពើពុល ស្ថិតក្នុងឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង។
ជនរងគ្រោះមានឈ្មោះ គង់ ភារុំ ភេទប្រុស អាយុ ២៧ឆ្នាំជាកូន និងឈ្មោះ ម៉ក់ ចក់ អាយុ ៥៤ឆ្នាំ ជាឪពុករស់នៅក្នុងភូមិក្រម៉ាល់ ឃុំប្រឡាយមាស ស្រុកកំពង់លែង ខេត្តកំពង់ឆ្នាំង ។ ឪពុកនិងកូន ទាំងពីរនាក់នេះ បានបាត់តាំងពីថ្ងៃទី១៣ ខែវិច្ឆិកា ឆ្នាំ២០១៣ ខណៈដែលឪពុកបានជូនកូន ពីផ្ទះមកផ្សារក្រោម ហើយក៏បាត់ឈឹង ហើយក្រុមគ្រួសារបាននាំគ្នា ដើររកដែរតែមិនឃើញ តែមានគេប្រទះឃើញកាណូតបាឡាស្មាច់របស់ជនរងគ្រោះបានអណ្តែត។
ក្រុមគ្រួសារជនរងគ្រោះ បានរាយការណ៍ទៅសមត្ថកិច្ច នៅពេលបានឃើញកាណូតនោះ មានស្លាកស្នាមដូចជាត្រូវ កាណូតផ្សេងទៀតគេបុកផងដែរ ។ អ្នកនេសាទបាននិយាយថា កាលពី ៣ថ្ងៃមុននេះ នៅវេលាម៉ោងប្រមាណជាង ៤ទៀបភ្លឺ ពួកគាត់បានឮសំលេង កាណូតបុកគ្នានៅចំណុច ភូមិក្រម៉ាល់ ឃុំប្រឡាយមាស ស្រុកកំពង់លែង ហើយក្រោយពេលប្រទះឃើញសាកសព សមត្ថកិច្ចបានចុះទៅពិនិត្យ ដោយសន្និដ្ឋានថា មិនមែនជាករណីឃាតកម្មនោះទេ អាចជាករណីគ្រោះថ្នាក់ ដោយសារតែការណូតបុកគ្នា ហើយភាគីម្ខាងបានបើករត់បាត់៕
Source from: watphnom-news.com
Loading...
Post a Comment