រាជធានីភ្នំពេញ៖មូលនិធិសកលដែលមានឈ្មោះជាភាសាអង់គ្លេសGlobalFundបានចេញរបាយការណ៍ស៊ើបអង្កេតមួយ រាជធានីភ្នំពេញ ៖ មូលនិធិសកល ដែលមានឈ្មោះ ជាភាសាអង់គ្លេស Global Fund បានចេញរបាយការណ៍ស៊ើបអង្កេតមួយ កាលពីថ្ងៃទី១៤ ខែវិច្ឆិកា ដោយបង្ហាញភស្តុតាងជាច្រើន ទាក់ទងនឹងបណ្ដាញ ប្រព្រឹត្តិអំពើពុករលួយក្នុង ក្រសួងសុខាភិបាលហើយរបាយការណ៍នេះ បានរកឃើញថា ស្ថាប័នពីរ និងអង្គការមិនមែនរដ្ឋាភិបាល មួយចំនួនធ្លាប់បានភូតកុហក កិបកេងប្រាក់ជំនួយពីមូលនិធិសកល តាំងពីឆ្នាំ២០០៩ ក្នុងប្រតិបត្តិការការងារ ទប់ស្កាត់ការរីករាលដាល នៃជំងឺឆ្លងទាំងនេះ។
មានការបញ្ជាក់យ៉ាងច្បាស់ថា ស្ថាប័ននិងអង្គការដែលធ្លាប់ ធ្វើរបាយការណ៍ភូតកុហក មូលនិធិសកល រួមមាន មជ្ឈមណ្ឌលជាតិ ប្រយុទ្ធជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ និងមជ្ឈមណ្ឌលជាតិ ប្រយុទ្ធនឹងជំងឺអេដស៍ សើស្បែក និងកាមរោគ ព្រមទាំងអង្គការមេឌីខាំ (MEDICAM)។ យោងតាមរបាយការណ៍ ស៊ើបអង្កេតកម្រាស់ ៨៣ ទំព័រ របស់មូលនិធិសកល ដែលបានស៊ើបអង្កេតលើប្រាក់ជំនួយ របស់មូលនិធិនេះចំនួនជាង ៨០ លានដុល្លារ ដែលផ្តល់មកឲ្យស្ថាប័ន ចំណុះក្រសួងសុខាភិបាល បានរកឃើញភស្តុតាង សំខាន់ៗជាច្រើន ដែលបញ្ជាក់ថា ការដេញថ្លៃមួយចំនួនមានភាពមិនប្រក្រតី ការកិបកេងប្រាក់ជំនួយ និងការប្រើប្រាស់ប្រាក់ជំនួយ ខុសគោលដៅ។
របាយការណ៍បន្តថា អតីតប្រធានមជ្ឈមណ្ឌលជាតិ ប្រយុទ្ធជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ លោក ដួង សុជាតិ និងសហការីម្នាក់ បានទទួលប្រាក់សគុណចំនួនជិត ៥ សែនដុល្លារ ពីក្រុមហ៊ុនផ្គត់ផ្គង់មុងឈ្មោះ វេសតើហ្គាត ហ្វ្រេនសិន (Vestergaard Frandsen) ដែលមានទីតាំងនៅប្រទេសស្វីស និងក្រុមហ៊ុនសាំមិតូ ឆាមមីសល (Sumitomo Chemical Singapore) ដែលមានទីតាំង នៅប្រទេសសិង្ហបុរី ហើយក្រុមហ៊ុនទាំងពីរនេះ បានផ្តល់ប្រាក់សគុណជូនមន្ត្រីទាំងនេះ ជាថ្នូរនឹងការទទួលបានកិច្ចសន្យា ជាមួយក្រសួងសុខាភិបាល។
ចំពោះមន្ត្រីជាន់ខ្ពស់ នៃមជ្ឈមណ្ឌលជាតិ ប្រយុទ្ធនឹងជំងឺអេដស៍ សើស្បែក និងកាមរោគ ដែលទទួលបន្ទុកគ្រប់គ្រង ការដេញថ្លៃគម្រោងមួយ ក៏ត្រូវអង្គភាពសវនកម្ម របស់មូលនិធិពិភពលោក រកឃើញថា បានទទួលប្រាក់សគុណ ពីភាគីក្រុមហ៊ុនមួយ ចំនួន ១៥% នៃទឹកប្រាក់គម្រោងជិត ៣សែន២ ម៉ឺនដុល្លារ ឬស្មើនឹងជាង ៤ ម៉ឺនដុល្លារ។ មន្ត្រីរូបនោះក៏បានសារភាព ប្រាប់ស្ថាប័នត្រួតពិនិត្យ របស់មូលនិធិ សកល ដោយបញ្ជាក់ថា ខ្លួនបានយកប្រាក់នេះ ទៅទិញឡាននិងសម្ភារៈ ប្រើប្រាស់ផ្ទាល់ខ្លួនមួយចំនួនទៀត។
របាយការណ៍បានបន្តថា អង្គការ មេឌីខាំ ដែលបានយកប្រាក់ជំនួយ ពីមូលនិធិពិសកល សម្រាប់ជួលបុគ្គលិកចំនួន ២ នាក់ ធ្វើការក្នុងគម្រោងទប់ស្កាត់ ការរីករាលដាលនៃជំងឺអេដស៍ ដោយចំណាយប្រាក់ជាង ២ ម៉ឺនដុល្លារ ប៉ុន្តែអង្គការនេះ បែរជាមិនបានជួល បុគ្គលិកធ្វើការទៅវិញ។ ទាំងនេះគ្រាន់តែជាករណី ពុករលួយតូចមួយ ក្នុងចំណោមរាប់ពាន់ករណី ផ្សេងទៀតប៉ុណ្ណោះ ហើយគួរតែមានការកោះហៅរដ្ឋមន្ត្រីក្រសួងសុខាភិបាល មកសួរនាំពីបញ្ហានេះ ដើម្បីបង្កើនទំនុកចិត្ត សម្រាប់ម្ចាស់ជំនួយ មកលើរាជរដ្ឋាភិបាលកម្ពុជា។
យោងតាមមាត្រា៥៩២ នៃក្រមព្រហ្មទណ្ឌ បានចែងថា ពីបទវិតិក្រមដែលជា ទង្វើរបស់មន្ត្រីរាជការសាធារណៈ ឬពលរដ្ឋទទួល អាណត្តិសាធារណៈ ដោយបោះឆ្នោត៖ ១-ដែលទាមទារ ឬទទួលជាសិទ្ធិជាពន្ធ ជាអាករ នូវចំនួនប្រាក់ដែលខ្លួន បានដឹងថាមិនត្រូវបង់ ឬចំនួនលើសទឹកប្រាក់ ដែលត្រូវបង់។ ២-យល់ព្រមក្រោមរូបភាពណាមួយ និងដោយមូលហេតុណាមួយក៏ដោយ ធ្វើការលើកលែង ឬការលោះលា ចំពោះការបង់ពន្ធ ឬអាករ ដែលខ្លួនដឹងថាខុសច្បាប់។ តាមមាត្រា៥៩៣ ក៏បានចែងពីទម្ងន់នៃទោស គឺត្រូវដាក់ពន្ធនាគារពី ២ឆ្នាំ ទៅ ៥ឆ្នាំ និងពិន័យជាប្រាក់ពី ៤លាន ទៅ ១០លានរៀលផងដែរ៕
Source from: watphnom-news.com
Loading...
Post a Comment