ខេត្តបាត់ដំបង៖បុរស២នាក់ក្នុងចំណោមបក្ខពួកប្រហែល១០នាក់បន្ទាប់ពីផឹកស៊ីស្រវឹងធ្លាក់ភ្នែកបានមើលមនុស្សច្រឡំខេត្តបាត់ដំបង ៖ បុរស ២នាក់ក្នុងចំណោមបក្ខពួក ប្រហែល ១០នាក់ បន្ទាប់ពីផឹកស៊ីស្រវឹងធ្លាក់ភ្នែក បានមើលមនុស្សច្រឡំ នាំគ្នាព្រួតវាយយុវជនម្នាក់ បណ្តាលឲ្យរងរបួសធ្ងន់ ពេលឡើងជិះម៉ូតូចេញពីមើលតន្ត្រី បម្រុងត្រឡប់ទៅផ្ទះ ហើយសមត្ថកិច្ចបានឃាត់ខ្លួន ជនសង្ស័យម្នាក់ភ្លាមៗ កាលពីម៉ោង ២១និង៣០ យប់ថ្ងៃទី១៨ ខែវិច្ឆិកា ឆ្នាំ២០១៣ នៅចំណុចក្រុមទី២២ ភូមិអញ្ចាញ សង្កាត់អូរចារ ក្រុងបាត់ដំបង។
បុរសដែលសមត្ថកិច្ចឃាត់ខ្លួនមានទី១-ឈ្មោះ តូ ចន្ទី ហៅទី អាយុ ២៥ ឆ្នាំមានទីលំនៅក្រុមទី៧ ភូមិអណ្តូងចេញ សង្កាត់អូរចារ ក្រុងបាត់ដំបង និងទី២-ឈ្មោះនី វណ្ណារិទ្ធ អាយុ ១៩ ឆ្នាំនៅក្រុមទី៨ ភូមិអណ្តូងចេញ សង្កាត់អូរចារ ក្រុងបាត់ដំបង។ ចំណែកយុវជនរងគ្រោះ ឈ្មោះ លេង ដារ៉ារិទ្ធ អាយុ ១៩ ឆ្នាំមានស្នាមរបួស លើចិញ្ចើមខាងឆ្វេង ជាំក្រោមភ្នែកឆ្វេង និងជាំសាច់ដុំដៃស្តាំ រស់នៅភូមិសំរោងក្នុង ឃុំសំរោង ក្នុងស្រុកឯកភ្នំ ខេត្តបាត់ដំបង។
ជនសង្ស័យទាំងពីរនាក់ បានឆ្លើយសារភាពថា នៅយប់ថ្ងៃអកអំបុក សំពះព្រះខែ ខ្លួននិងបក្ខពួកប្រហែល ១០ នាក់បាននាំគ្នា ផឹកស៊ីនៅចំណុចក្រុមទី២២ ភូមិអញ្ចាញ សង្កាត់អូរចារ រហូតដល់ម៉ោង ៩ យប់ដោយម្នាក់ៗស្រវឹងធ្លាក់ភ្នែក។ ពេលនោះមានយុវជន មួយក្រុមទៀត មានគ្នា ៤-៥ នាក់បានដើរមកជិតកន្លែងពួកគេ ដែលកំពុងផឹកស៊ី ហើយខ្លួនមើលឃើញក្នុងចំណោមនោះ មានម្នាក់ជាអ្នកធ្លាប់វាយមកលើពួកខ្លួន កាលពីខែតុលា ឆ្នាំ២០១៣ ក៏នាំគ្នាព្រួតវាយតែម្តង។
ក្រោយពីវាយមនុស្សរងរបួសរួច ទើបដឹងថាវាយច្រឡំមនុស្ស ក៏នាំគ្នារត់គេចខ្លួន តែត្រូវក្រុមនគរបាលដេញចាប់បានម្នាក់ ហើយឈានទៅចាប់បានម្នាក់ទៀត។ មន្ត្រីនគរបាលការិយាល័យ ព្រហ្មទ័ណ្ឌកំរិតស្រាល បានបញ្ជាក់ថា បុរសសង្ស័យទាំង ២ នាក់ត្រូវរៀបចំកសាង សំណុំរឿងបញ្ជូនទៅ សាលាដំបូង នៅព្រឹកថ្ងៃទី២០ ខែវិច្ឆិកា នេះដើម្បីចាត់ការតាមនីតិវិធី៕
Source from: watphnom-news.com
Loading...
Post a Comment