កង្វះ​​ការ​ស៊ើប​អ​ង្កេត​​ដោយឯក​រាជ្យ​​បង្ហា​ញ​ថា​ ​ជីវិត​​របស់​​ប្រ​ជា​ជន​​បាន​​ស្លាប់​​ដោយ​​ឥត​ន័យ​ និង​​ជា​ការ​​ប្រ​មាថ ដល់​​​ព្រ​លឹង​​អ្នក​ស្លាប់​​នៅ​លើ​​ស្ពាន​​ពេជ្រ​

Daily News, In Khmer, sex, Sexy, Social News

11/22/2013 08:01:00 AM

រាជធានីភ្នំពេញ៖អំឡុងពេលប្រារព្ធពិធីគោរពវិញ្ញាណក្ខន្ធអ្នកស្លាប់ដោយសាររត់ជាន់គ្នានៅលើស្ពានពេជ្រកាលពីព្រឹកថ្ងៃទី២២ខែវិច្ឆិកា

រាជធានីភ្នំពេញ ៖ អំឡុងពេលប្រារព្ធ ពិធីគោរពវិញ្ញាណក្ខន្ធ អ្នកស្លាប់ដោយសាររត់ជាន់គ្នា នៅលើស្ពានពេជ្រ កាលពីព្រឹកថ្ងៃទី២២ ខែវិច្ឆិកា ឆ្នាំ២០១៣ នេះ អភិបាលរាជធានីភ្នំពេញ លោក ប៉ា សុជាតិវង្ស បានបញ្ជាក់ថា ការប្រារព្ធពិធីគោរពវិញ្ញាណក្ខន្ធអ្នកស្លាប់នៅលើស្ពានពេជ្រ កាលពីឆ្នាំ២០១០ នឹងត្រូវធ្វើឡើងជារៀងរាល់ឆ្នាំ ដោយមិនទាក់ទង នឹងរឿងនយោបាយ ប៉ុន្តែមិនបាននិយាយពីការនាំអ្នកទទួលខុសត្រូវ ទៅកាត់ទោសនោះទេ។

លោក ប៉ា សុជាតិវង្ស មានប្រសាសន៍ថា ការរត់ជាន់ជើងគ្នានៅស្ពានពេជ្រ ជាព្រឹត្តិការណ៍ប្រវត្តិសាស្ត្រ ដែលការគោរពវិញ្ញាណក្ខន្ធ នឹងត្រូវធ្វើឡើងជាលក្ខណៈពិធីព្រះពុទ្ធសាសនា ដើម្បីឧទ្ទិសដល់អ្នកបាត់បង់ជីវិត មិនមែនផលប្រយោជន៍ នយោបាយណាមួយឡើយ។ គិតមកដល់ថ្ងៃទី២២ខែវិច្ឆិកា ឆ្នាំ២០១៣ នេះ គឺខួប ៣ឆ្នាំហើយនៃឧបទ្ទេវហេតុ រត់ជាន់គ្នាស្លាប់លើស្ពាន នៅកោះពេជ្រ បណ្តាលឲ្យមនុស្សប្រមាណ ៣៥០ នាក់ស្លាប់ និងជាង ៤០០នាក់ទៀតរងរបួស។

យ៉ាងណាក៏ដោយប្រធានគណបក្សសង្គ្រោះជាតិ លោក សម រង្ស៊ី បានជំរុញជាថ្មីទៀត ឲ្យរាជរដ្ឋាភិបាលបង្កើត គណៈកម្មការឯករាជ្យ ស៊ើបអង្កេត លើករណីមនុស្សស្លាប់ លើស្ពានកោះពេជ្រ ដោយបញ្ជាក់យ៉ាងច្បាស់ថា ករណីមនុស្សស្លាប់លើស្ពានពេជ្រនោះ រដ្ឋាភិបាលលោក ហ៊ុន សែន និងអតីតអភិបាលរាជធានីភ្នំពេញ លោក កែប ជុតិមា ជាអ្នកទទួលខុសត្រូវ។ រហូតមកដល់ពេលនេះ គ្មាននរណាម្នាក់ទទួលខុសត្រូវ ចំពោះបរាជ័យក្នុងការ គ្រប់គ្រងក្រុមមនុស្សកាលពីពេលនោះឡើយ ហើយពិធីបុណ្យអុំទូក ក៏ត្រូវបានលុបចោល តាំងពីពេលនោះមក។

គណបក្សសង្គ្រោះជាតិបានរៀបចំ ពិធីគោរពវិញ្ញាណក្ខន្ធ អ្នកស្លាប់នៅលើស្ពានពេជ្រកាលពីថ្ងៃទី២១ ខែវិច្ឆិកា សម្រាប់ការរំលឹកខួប ៣ឆ្នាំ ហើយអ្នកស្រី សួន អែ អាយុ ៤៨ឆ្នាំ មានកូនស្រីអាយុ ២៤ឆ្នាំឈ្មោះ ស៊ុំ ចាន់ធឿន ដែលបានបាត់បង់ជីវិត ក្នុងហេតុការណ៍ផ្អើលរត់ជាន់គ្នានោះ បានធ្វើដំណើរពីខេត្តតាកែវ ដើម្បីចូលរួមពិធីរំឭកដល់ការស្លាប់ របស់កូនស្រីគាត់។ អ្នកស្រីបានមានប្រសាសន៍ ទាំងទឹកភ្នែកថា “ពេលនេះខ្ញុំ ត្រូវមើលថែ កូនពីរនាក់របស់នាង ម្នាក់ជាកូនប្រុសអាយុ ៧ឆ្នាំ និងម្នាក់ទៀត ជាកូនស្រីអាយុ ៤ឆ្នាំ។ ខ្ញុំយំរយៈពេលបីឆ្នាំហើយ”។

អ្នកស្រី សួន អែ ឲ្យដឹងថា អ្នកស្រីទទួលប្រាក់ចំនួន ១៤.៦០០ ដុល្លារពីរដ្ឋាភិបាល ដែលនេះជាប្រាក់សំណង សម្រាប់ការស្លាប់របស់កូនស្រីគាត់ ក៏ប៉ុន្តែប្រាក់ទាំងនោះមិនបានរំលត់ ការឈឺចាប់របស់អ្នកស្រីនោះឡើយ។ លោកស្រី មូរ សុខហួរ តំណាងរាស្ត្រគណបក្សសង្គ្រោះជាតិ បានថ្លែងថា “ការខ្វះការស៊ើបអង្កេតឯករាជ្យ មានន័យថា ជីវិតរបស់ប្រជាជនទាំងនោះ បានបាត់បង់ដោយឥតន័យ ហើយបញ្ហានេះជាការប្រមាថ ដល់ព្រលឹងអ្នកស្លាប់ និងដល់ការឈឺចាប់ របស់គ្រួសារដែលរស់នៅ ក្នុងសង្គមគ្មានយុត្តិធម៌”៕