រាជធានីភ្នំពេញ៖ពាក្យបណ្តឹងត្រូវបានដាក់ជូនអង្គភាពប្រឆាំងអំពើពុករលួយច្រើនខែមកហើយតាំងពីសម័យលោកច័ន្ទរាជធានីភ្នំពេញ ៖ ពាក្យបណ្តឹងត្រូវបានដាក់ជូន អង្គភាពប្រឆាំង អំពើពុករលួយ ច្រើនខែមកហើយ តាំងពីសម័យលោក ច័ន្ទ សារុន ធ្វើជារដ្ឋមន្ត្រី ក្រសួងកសិកម្មមកម្ល៉េះ រហូតដល់ពេលនេះ ថ្នាក់អនុប្រធានមន្ទីរ ប្រធាន អនុប្រធានការិយាល័យជំនាញនិងមន្ត្រីតាមការិយាល័យ កសិកម្មស្រុក នៅទូទាំងខេត្តកំពង់ឆ្នាំង ក៏បាននាំគ្នាធ្វើរបាយការណ៍ ដាក់ជូនលោក អ៊ុក រ៉ាប៊ុន ជារដ្ឋមន្ត្រីក្រសួងកសិកម្ម ទើបឡើងថ្មី ពាក់ព័ន្ធអំពើពុករលួយ និងភាពអសកម្មរបស់លោក ង៉ាន ណានី ដោយទាមទារឲ្យថ្នាក់លើ ពិនិត្យដោះស្រាយបញ្ហាទាំងនេះ ឡើងវិញជាបន្ទាន់។ ដូច្នេះការដកហូតមុខតំណែង របស់លោក ង៉ាន ណានី អាចនឹងកើតមានក្នុងថ្ងៃណាមួយ ស្របទៅតាមការកែទម្រង់ របស់រាជរដ្ឋាភិបាល ហើយវាគ្មានសំណាងល្អប៉ុន្មានទេ ប្រសិនបើលោក ង៉ាន ណានី សម្តែងប្ញកក្រអឺតក្រទម ដាក់មន្ត្រីថ្នាក់ក្រោម ដែលហ៊ានបើកកកាយរឿងអាស្រូវ ពុករលួយរបស់គាត់ ដោយចាត់ទុកថាមន្ត្រី ទាំងនោះជាក្រុមប្រឆាំង។
ក្នុងលិខិតជាច្រើនច្បាប់ គេរកឃើញលិខិត ដាច់ដោយឡែកមួយ ដែលក្រុមមន្ត្រីចំនួន ៤៧នាក់ បានរៀបរាប់យ៉ាងលម្អិត ដាក់ជូនលោករដ្ឋមន្ត្រី អ៊ុក រ៉ាប៊ុន មានបញ្ជាក់អំពីករណី លក់ចេញស្រូវពូជអន់គុណភាព ក៏ដូចជាការទិញស្រូវពូជថ្មី បញ្ចូលឃ្លាំងវិញ ដែលមិនបានផលិត ឲ្យត្រឹមត្រូវតាមបច្ចេកទេស ដើម្បីត្រៀមបម្រុងជួយ ដល់ប្រជាកសិករ ពេលជួបគ្រោះធម្មជាតិ ធ្វើឡើងដោយគ្មានតម្លាភាព អ្វីៗសុទ្ធសឹងតែធ្វើតាមសេណារិយោ ដែលរៀបចំដោយលោក ង៉ាន ណានី ប្រធានមន្ទីរកសិកម្ម មានការឃុបឃិត ជាមួយលោក សំ សុផល ជាប្រធានការិយាល័យ កសិឧស្សាហកម្ម។ ការចាយវាយប្រាក់គម្រោង សម្រាប់ការទិញស្រូវពូជ និងលក់ស្រូវពូជ ដោយមិនតម្លាភាពនេះ ធ្វើឡើងដោយមានការឃុបឃិតត្រូវរ៉ូវគ្នា រវាងក្រុមឈ្មួញ និងលោក ង៉ាន ណានី ហើយគេរៀបចំឯកសារមួយចំនួន ឲ្យត្រឹមត្រូវតាមនីតិវិធីហិរញ្ញវត្ថុ តែប៉ុណ្ណោះ ព្រោះលោក ង៉ាន ណានី បានកាន់លុយសម្រាប់ ការទិញលក់ស្រូវពូជនេះ ដោយខ្លួនឯង ចាត់ចែងការងារដោយ គ្មានតម្លាភាព គ្មានការឯកភាពពីសមាជិក។
ទង្វើរបស់លោក ង៉ាន ណានី ទាំងនេះ ត្រូវក្រុមមន្ត្រីតូចតាចជាច្រើន បានលើកឡើងថា គាត់មិនបានព្រឺរោមជើង ចំពោះអង្គភាពប្រឆាំងអំពើពុករលួយ សូម្បីតែបន្តិច ក៏ព្រោះតែលោក ង៉ាន ណានី មានអំណួតថា គ្មាននរណាហ៊ានធ្វើអ្វីគាត់ទេ សូម្បីតែលោករដ្ឋមន្ត្រី អ៊ុក រ៉ាប៊ុន ដែលមន្ត្រីតូចតាច ពឹងអាស្រ័យឲ្យជួយរកដំណោះស្រាយ ក៏សុទ្ធសឹងជាមនុស្សដែលគាត់ ធ្លាប់ជិតដិត ព្រោះលោក អ៊ុក រ៉ាប៊ុន បានចុះពង្រឹងមូលដ្ឋាន នៅខេត្តកំពង់ឆ្នាំងជាមួយគាត់ដែរ គ្រាន់តែខុសស្រុកប៉ុណ្ណោះ។ ជារឿយៗលោក ង៉ាន ណានី បានក្តោបក្តាប់ទ្រព្យសម្បត្តិរដ្ឋ ចំណុះឲ្យអង្គភាពមានរថយន្ត និងរបបប្រេងសាំងជាដើម យកទៅប្រើប្រាស់ផ្ទាល់ខ្លួន ហើយគ្រាន់តែរថយន្ត ដែលលោក ង៉ាន ណានី ប្រើប្រាស់ផ្ទាល់ខ្លួន ក្នុងមួយខែៗ មិនដឹងជាចំណាយរបបសាំង អស់ប៉ុន្មានទេ ហាក់ដូចជាគ្មានគំនិត សន្សំសំចៃនោះទេ ហើយពេលខ្លះទៀត មន្ត្រីតូចតាចបានលើកអំពីរឿង ដែលមន្ទីរកសិកម្មខេត្តកំពង់ឆ្នាំង ជំពាក់បំណុលឯកជនគួរឲ្យភ្ញាក់ផ្អើល។
អង្គភាពប្រឆាំងអំពើពុករលួយ បន្ទាប់ពីទទួលបានពាក្យបណ្តឹង ពីមន្ត្រីតូចតាច ក៏បានចាត់វិធានការចុះទៅ ស៊ើបអង្កេតស្រាវជ្រាវផងដែរ ប៉ុន្តែមកដល់ម៉ោងនេះ ស្ងាត់សូន្យឈឹងមិនទាន់ ទម្លាយរបាយការណ៍ស៊ើបអង្កេតនៅឡើយទេ ដូច្នេះហើយបានជា មន្ត្រីតូចតាច នាំគ្នាដាក់របាយការណ៍ ជម្រាបជូនលោករដ្ឋមន្ត្រី អ៊ុក រ៉ាប៊ុន ឲ្យជួយពិនិត្យនិងដោះស្រាយ បាតុភាពមិនប្រក្រតី ទាំងនេះឡើងវិញ។ គេតែងតែរំពឹងទុកថា លោករដ្ឋមន្ត្រី អ៊ុក រ៉ាប៊ុន នឹងមិនមើលរំលង ពីភាពអសកម្មដែលកំពុងតែ នាំឲ្យមានការបែកបាក់ សាមគ្គីភាពផ្ទៃក្នុង ក្រោមការដឹកនាំរបស់លោក ង៉ាន ណានី ដែលអសកម្មពុករលួយ ហើយទាំងការងារក្នុងអង្គភាព និងក្រៅអង្គភាពលោក ង៉ាន ណានី គិតតែកេងប្រវ័ញ្ច ដើម្បីផលប្រយោជន៍ ផ្ទាល់ខ្លួនប៉ុណ្ណោះ ដូចជាការកិបកេងប្រេងសាំង សម្រាប់បូមទឹកសង្គ្រោះស្រូវ របស់ប្រជាពលរដ្ឋ គឺមិនដែលធ្លាក់ដល់ដៃប្រជាកសិករទេ ព្រោះលោកង៉ាន ណានី បានយកទៅប្រើប្រាស់ ជាប្រយោជន៍ផ្ទាល់ខ្លួន៕
Source from: watphnom-news.com
Loading...
Post a Comment