រាជធានីភ្នំពេញ៖ព្យុះកំបុតត្បូងហាយយ៉ានដែលបានវាយប្រហារប្រទេសហ្វីលីពីនយ៉ាងធ្ងន់ធ្ងរនឹងមានឥទ្ធិពលដល់តំបន់ខ្ពង់រាបភាគខាងជើងរាជធានីភ្នំពេញ ៖ ព្យុះកំបុតត្បូង ហាយយ៉ាន ដែលបានវាយប្រហារ ប្រទេសហ្វីលីពីនយ៉ាងធ្ងន់ធ្ងរ នឹងមានឥទ្ធិពលដល់ តំបន់ខ្ពង់រាបភាគខាងជើង នៃប្រទេសកម្ពុជា នៅថ្ងៃទី១០ ខែវិច្ឆិកា ឆ្នាំ២០១៣ ហើយក្រសួងធនធានទឹកនិងឧតុនិយម បានធ្វើការតាមដានយ៉ាងយកចិត្តទុកដាក់បំផុត អំពីដំណើររបស់ព្យុះនេះ ព្រោះវាមានឥទ្ធិពលដល់ប្រទេសកម្ពុជា។
លោក ចាន់ យុត្ថា អ្នកនាំពាក្យ និងជានាយកខុទ្ទកាល័យ ក្រសួងធនធានទឹកនិងឧតុនិយម បានឲ្យដឹងថា ព្យុះទី៣០ ឈ្មោះ ហាយយ៉ាន់ (Haiyan) ដែលកំពុងវាយប្រហារ លើប្រទេសហ្វីលីពីន ជាព្យុះកំបុត្បូងដ៏ធំបំផុត ដែលពួកអ្នកឧតុនិយម បានប្រដូចវាទៅនឹងព្យុះកាមីយ៍ (CAMILLE) ដែលបានវាយប្រហារលើ សហរដ្ឋអាមេរិក កាលពីឆ្នាំ១៩៦៩ ដោយបង្កឲ្យមានមហន្តរាយយ៉ាងធ្ងន់ធ្ងរ។
ក្រសួងធនធានទឹកនិងឧតុនិយម នៅថ្ងៃទី ៨ខែវិច្ឆិកាឆ្នាំ២០១៣ បានជូនដំណឹងដល់ក្រសួង ស្ថាប័នពាក់ព័ន្ធ អាជ្ញាធរដែនដី និង សាធារណជនថា នៅវេលាព្រឹកថ្ងៃទី ៨ ខែវិច្ឆិកា ឆ្នាំ២០១៣ នេះព្យុះទី៣០ ឈ្មោះ ហាយយ៉ាន់ (Haiyan) បាននឹងកំពុងស្ថិត នៅលើប្រទេសហ្វីលីពីន។ តាមការព្យាករណ៍ព្យុះនេះ នឹងធ្វើដំណើរមកដល់ ឆ្នេរប្រទេសវៀតណាម ភាគកណ្តាល នៅយប់ថ្ងៃទី១០ ខែវិច្ឆិកា ឆ្នាំ២០១៣ ខាងមុខនេះ។
សេចក្តីជូនដំណឹងដែលចុះហត្ថលេខាដោយលោក លឹម គានហោ រដ្ឋមន្ត្រីក្រសួងធនធានទឹកនិងឧតុនិយម បានបញ្ជាក់ថា ដំណើរមកដល់ឆ្នេររបស់វៀតណាម របស់ព្យុះហាយយ៉ាន់ នឹងធ្វើឲ្យព្រះរាជាណាចក្រកម្ពុជា មានភ្លៀងធ្លាក់ពីមធ្យមទៅច្រើន រួមជាមួយនឹងខ្យល់កន្ត្រាក់ បក់បោកខ្លាំងចាប់ពីថ្ងៃទី១០ ដល់ថ្ងៃទី១១ ខែវិច្ឆិកា នៅតំបន់ខ្ពង់រាបភាគខាងជើង និងខ្ពង់រាបភាគឦសានរួមមានខេត្តឧត្តរមានជ័យ ព្រះវិហារ រតនគីរី មណ្ឌលគីរី ស្ទឹងត្រែង និងខេត្តក្រចេះ។
សេចក្តីជូនដំណឹងរបស់រដ្ឋមន្ត្រី ក្រសួងធនធានទឹកនិងឧតុនិយម នេះ ក៏បានអំពាវនាវជាពិសេស ដល់បងប្អូនប្រជាពលរដ្ឋ រស់នៅតាមបណ្តាខេត្ត ដូចបានជម្រាបជូនខាងលើ ឲ្យបង្កើនការយកចិត្តទុកដាក់ ប្រុងប្រយ័ត្នឲ្យបានខ្ពស់បំផុត ដើម្បីចៀសវាងនូវគ្រោះថ្នាក់ផ្សេងៗ ដែលអាចកើតមានឡើង ជាយថាហេតុ៕
Source from: watphnom-news.com
Loading...
Post a Comment