រាជធានីភ្នំពេញ៖ថ្មីៗនេះគេរកឃើញអនុក្រឹត្យមួយដែលចុះហត្ថលេខាកាលពីថ្ងៃទី០៨ខែវិច្ឆិកាកន្លងទៅនេះបានបង្ហាញថារាជធានីភ្នំពេញ ៖ ថ្មីៗនេះគេរកឃើញអនុក្រឹត្យមួយ ដែលចុះហត្ថលេខា កាលពីថ្ងៃទី០៨ ខែវិច្ឆិកា កន្លងទៅនេះ បានបង្ហាញថា អចលនទ្រព្យសំខាន់ៗ ជាទីតាំងអគាររដ្ឋ ដែលសេសសល់តាំងពី សម័យសង្គមរាស្ត្រនិយម ចំនួន ៦កន្លែងក្នុងរាជធានីភ្នំពេញ និងខេត្តបាត់ដំបង ត្រូវបានរៀបចំ ធ្វើចំណាត់ថ្នាក់ឡើងវិញ ជាអចលនទ្រព្យរបស់រដ្ឋ កាន់កាប់ដោយឯកជន ដើម្បីត្រួសត្រាយផ្លូវ សម្រាប់ការលក់ដូរ ឬការផ្លាស់ប្តូរទីតាំង ជាមួយក្រុមហ៊ុនឯកជននានា។
អនុក្រឹត្យដែលចុះហត្ថលេខា ដោយសម្តេច ហ៊ុន សែន បានផ្លាស់ប្តូរស្ថានភាព អគាររដ្ឋបាល ចំនួន ៦ទីតាំង ពីអគារសាធារណៈរបស់រដ្ឋ ដែលមិនអាចលក់ដូរបាន ទៅជាអគារឯកជនរបស់រដ្ឋ ហើយអគារទាំងនោះ ស្ថិតនៅក្រោមការគ្រប់គ្រង របស់ក្រសួងប្រៃសណីយ៍ និងទូរគមនាគមន៍ និងក្រសួងឧស្សាហកម្មរ៉ែ ដែលគ្របដណ្តប់លើផ្ទៃដីសរុប ដល់ទៅជាង ៦៤,៥៨៧ ម៉ែត្រក្រឡា។ ក្នុងចំណោមអគារដែលត្រូវ ធ្វើចំណាត់ថ្នាក់ឡើងវិញ តាមសេចក្តីសម្រេច ក្នុងអនុក្រឹត្យនោះរួមមាន ទីតាំងការិយាល័យប្រៃសណីយ៍ សាខាបឹងព្រលិត ស្ថិតនៅតាមបណ្តោយ មហាវិថីព្រះសីហនុ នៅក្បែរចំណុចប្រសព្វគ្នា ជាមួយមហាវិថីព្រះមុនីវង្ស ដែលនេះជាអគារ ការិយាល័យប្រៃសណីយ៍ធំបំផុតទី២ ក្នុងរាជធានីភ្នំពេញ ដែលមានទំហំ ១,៥៨៤ម៉ែត្រក្រឡា។
ដោយឡែក ការិយាល័យប្រៃសណីយ៍មួយទៀត គឺសាខាអូឡាំពិក ក៏ត្រូវបានផ្លាស់ប្តូរទៅជា អចលនទ្រព្យឯកជនផងដែរ។ នៅខេត្តបាត់ដំបងឯណោះវិញ ដីរដ្ឋដែលមានទំហំ ៦២,៧៤០ម៉ែត្រក្រឡា ដែលជាកម្មសិទ្ធិ របស់ក្រសួងឧស្សាហកម្ម ក៏ត្រូវបានធ្វើចំណាត់ថ្នាក់ ឡើងវិញផងដែរ។ យោងតាមខ្លឹមសារនៃអនុក្រឹត្យដដែលនេះ ក៏មានការស្នើសុំឲ្យ ក្រសួងប្រៃសណីយ៍ និងក្រសួងឧស្សាហកម្ម ធ្វើចំណាត់ថ្នាក់ឡើងវិញ លើទីតាំងអគារទាំងនោះ។ ក្រុមមន្ត្រីមួយចំនួន មិនហ៊ានរៀបរាប់លម្អិត ពីបញ្ហាដោះដូរទីតាំង អគាររដ្ឋនិងដីជាកម្មសិទ្ធិ របស់រដ្ឋចំនួន ៦កន្លែងនេះទេ ហើយមន្ត្រីតូចតាចខ្លះ បានលើកឡើងថា មានគេរត់ការខ្វែងដៃខ្វែងជើង សម្រាប់ការលក់ដូរ ឬការដោះដូរទីតាំងអគាររដ្ឋ តាំងពីមុនពេលបោះឆ្នោតមកម្ល៉េះ។
អាចនិយាយបានថា ការប៉ុនប៉ងដោះដូរ ទីតាំងអគាររដ្ឋនេះ ធ្វើឡើងតាំងពីជំនាន់រដ្ឋមន្ត្រីមុន ដែលក្រសួងឧស្សាហកម្ម មានលោក ស៊ុយ សែម ហើយក្រសួងប្រៃសណីយ៍ មានលោក សូរ ឃុន ផងដែរ។ ស្ទើរក្លាយជាទម្លាប់ទៅហើយ សម្រាប់ការដោះដូរ ទីតាំងអគាររដ្ឋដែលភាសាសាមញ្ញ គេនិយាយថា លក់អគាររដ្ឋ ដែលស្ថិតក្នុងទីតាំងល្អ មានតម្លៃថ្លៃ ឲ្យក្រុមហ៊ុនឯកជន ដោយគ្មានតម្លាភាព ហើយក្រុមហ៊ុនទាំងនោះ ទៅទិញដីនៅជាយក្រុង ក្នុងតម្លៃថោកៗដើម្បីកសាង អគារដែលមិនសូវ មានគុណភាព គ្មានស្តង់ដារប្រគល់ជូនរដ្ឋវិញ ប្រមូលលុយចំណេញ យកទៅច្រកហោប៉ៅ ធ្វើមានធ្វើបានផ្ទាល់ខ្លួន តាមរបៀបពុករលួយ៕
Source from: watphnom-news.com
Loading...
Post a Comment