ស្វែង​យល់​អំពី​ការ​ផ្តល់​ប្រាក់​រង្វាន់​ចំពោះ​ជ័យ​លា​ភី​និង​ប្រាក់​ឧបត្ថម្ភ​ចំពោះ​គ្រូបង្វឹក​ក្នុង​ការ​ប្រកួត​កីឡា​ជា​លក្ខណៈ​អន្តរជាតិ​

12/21/2013 05:00:00 AM

គោលការណ៍នៃការផ្តល់ប្រាក់រង្វាន់ចំពោះជ័យលាភី និងប្រាក់ឧបត្ថម្ភចំពោះគ្រូបង្វឹក ដើម្បីជាការលើកទឹកចិត្តក្នុងការប្រកួតកីឡាជាលក្ខណៈអន្តរជាតិ បានកំណត់ដោយអនុក្រឹត្យរបស់រាជរដ្ឋាភិបាល លេខ៥៣២អនក្រ.បក ចុះថ្ងៃទី២៥ ខែវិច្ឆិកា ឆ្នាំ២០១៣ ។

ការផ្តល់ប្រាក់រង្វាន់ចំពោះជ័យលាភីឯកត្តជនដែលទទួលបានមេដាយមាស មេដាយប្រាក់ និងមេដាយសំរឹទ្ធិ ដែលត្រូវអនុវត្តន៍ចំពោះការប្រកួតកីឡាជាលក្ខណៈអន្តរជាតិនៅក្រៅប្រទេស និងនៅក្នុងប្រទេស ដែលកីឡាករកម្ពុជាត្រូវអនុញ្ញាតឲ្យចូលរួម ត្រូវបានកំណត់ដូចខាងក្រោម ៖

១-ការប្រកួតកីឡាអូឡាំពិករដូវក្តៅ ឬរដូវរងា "OLYMPIC Games" ៖ ក-មេដាយមាស ៖ ១២០លានរៀល ។ ខ-មេដាយប្រាក់ ៖ ៨០លានរៀល ។ គ-មេដាយសំរឹទ្ធិ ៖ ៦៤លានរៀល ។

២-ការប្រកួតកីឡាអាស៊ីរដូវក្តៅ ឬរដូវរងា "ASIAN Games" ៖ ក-មេដាយមាស ៖ ៨០លានរៀល ។ ខ-មេដាយប្រាក់ ៖៤០លានរៀល ។ គ-មេដាយសំរឹទ្ធិ ៖ ២៤លានរៀល ។

៣-ការប្រកួតកីឡាអាស៊ីអាគ្នេយ៍ "SEA Games" ៖ ក-មេដាយមាស ៖ ៤០លានរៀល ។ ខ-មេដាយប្រាក់ ៖ ៣០លានរៀល ។ គ-មេដាយសំរឹទ្ធិ ៖ ១៦លានរៀល ។

Sport-1 ដោយឡែក ការផ្តល់ប្រាក់រង្វាន់ និងប្រាក់់ឧបត្ថម្ភចំពោះកីឡាករជនពិការ ឯកត្តជន ដែលទទួលបានមេដាយមាស មេដាយប្រាក់ និងមេដាយសំរឹទ្ធិដែលត្រូវអនុវត្តន៍ចំពោះការប្រកួតកីឡាជាលក្ខណៈអន្តរជាតិនៅក្រៅប្រទេស និងនៅក្នុងប្រទេស ដែលកីឡាករជនពិការកម្ពុជាត្រូវអនុញ្ញាតឲ្យចូលរួមត្រូវបានកំណត់ដូចខាងក្រោម ៖

១-ការប្រកួតកីឡាប៉ារ៉ាឡាំពិកហ្គេមរដូវក្តៅ ឬរដូវរងា "IPC Games" ៖ ក-មេដាយមាស ៖ ១២០លានរៀល ។ ខ-មេដាយប្រាក់ ៖ ៨០លានរៀល ។ គ-មេដាយសំរឹទ្ធិ ៖ ៦៤លានរៀល ។

២-ការប្រកួតកីឡាអាស៊ីប៉ារ៉ាហ្គេមរដូវក្តៅ ឬរដូវរងា "ASIAN Para Games" ៖ ក-មេដាយមាស ៖ ៨០លានរៀល ។ ខ-មេដាយប្រាក់ ៖៤០លានរៀល ។ គ-មេដាយសំរឹទ្ធិ ៖ ២៤លានរៀល ។

៣-ការប្រកួតកីឡាករអាស៊ាន ប៉ារ៉ាហ្គេម "ASEAN Para Games" ៖ ក-មេដាយមាស ៖ ៤០លានរៀល ។ ខ-មេដាយប្រាក់ ៖ ៣០លានរៀល ។ គ-មេដាយសំរឹទ្ធិ ៖ ១៦លានរៀល ។

Sport ចំពោះការប្រកួតដែលមានកីឡាករជាក្រុម ហើយទទួលបានមេដាយ ប្រាក់រង្វាន់ជ័យលាភីជាក្រុម ត្រូវបានផ្តល់ឲ្យដោយប្រាក់រង្វាន់សម្រាប់ជ័យលាភីម្នាក់ៗគុណនឹងចំនួនកីឡាករដែលបានចូលរួមប្រកួតតាមនិយាមអន្តរជាតិ ។

រីឯគ្រូបង្វឹក ត្រូវបានផ្តល់ប្រាក់ឧបត្ថម្ភស្មើនឹងប្រាក់រង្វាន់របស់ជ័យលាភីដែលទទួលបានចំណាត់ថ្នាក់មេដាយខ្ពស់ជាងគេក្នុងវិញ្ញាសាប្រកួតក្នុងក្រុមដែលខ្លួនទទួលបន្ទុកបង្វឹក ។ គ្រូបង្វឹកជំនួយ ត្រូវទទួលប្រាក់ឧបត្ថម្ភចំនួន៧០ភាគរយ នៃប្រាក់់ឧបត្ថម្ភសម្រាប់គ្រូបង្វឹក ។

សូមបញ្ជាក់ជូនដែរថា កីឡាករកម្ពុជាមួយចំនួនក្នុងរយៈពេលប៉ុន្មានថ្ងៃនេះ ក៏បានទៅចូលរួមប្រកួតកីឡាអាស៊ីអាគ្នេយ៍ "SEA Games" លើកទី២៧នៅប្រទេសមីយ៉ាន់ម៉ាផងដែរ ដែលគ្រោងនឹងបញ្ចប់កម្មវិធីប្រកួតនៅថ្ងៃទី២២ ខែធ្នូ ឆ្នាំ២០១៣ខាងមុខ ដោយគិតត្រឹមថ្ងៃទី២០ ខែធ្នូ ឆ្នាំ២០១៣នេះ កម្ពុជាទទួលបានមេដាយចំនួន៣៩ "ក្នុងនោះមេដាយមាសចំនួន៦, មេដាយប្រាក់ចំនួន៨ និងមេដាយសំរឹទ្ធិ ចំនួន២៥" ៕

Source from: www.dtn7.com