បុរស​ខ្លាំង​ព្រមាន​ក្រុម​បាតុករ​ឲ្យ​ប្រុង​ប្រយ័ត្ន​ទៅ​នឹង​”​បាតដៃ​ទី​៣”

12/21/2013 05:00:00 AM

"…គ្មានការរំលាយសភា និងគ្មានទេការបោះឆ្នោតឡើងវិញដែលផ្ទុយទៅនឹងមាត្រា៧៨នៃរដ្ឋធម្មនុញ្ញ…" នេះគឺជាប្រសាសន៍របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ហៅបុរសខ្លាំង ដែលបញ្ជាក់ប្រាប់អ្នកសារព័ត៌មាននៅក្រោយកិច្ចប្រជុំរដ្ឋសភាគណបក្សប្រជាជនកម្ពុជា ឯវិមានរដ្ឋសភាកាលពីថ្ងៃទី២០ ខែធ្នូ ឆ្នាំ២០១៣ម្សិលមិញ តបទៅនឹងសំណើទាមទាររបស់គណបក្សប្រឆាំងដែលកំពុងធ្វើមហាបាតុកម្មឈានចូលដល់ថ្ងៃទី៦ ខណៈគណបក្សប្រឆាំងប្រកាសថា គ្រោងធ្វើមហាបាតុកម្មជាប្រឆាំងរៀងរាល់ថ្ងៃឥតឈប់ ។

ពាក់ព័ន្ធនឹងការធ្វើមហាបាតុកម្មរបស់គណបក្សសង្គ្រោះជាតិនេះដែរ បុរសខ្លាំងបានបញ្ជាក់ថា ការធ្វើបាតុកម្មបិទផ្លូវ គឺដូចជាបិទឈាមខ្លួនឯង ដែលប៉ះពាល់មិនត្រឹមរាជរដ្ឋាភិបាល និងត្រឹមស្ថាប័នរដ្ឋមួយចំនួនទេ វាប៉ះពាល់ដល់ប្រជាជនថែមទៀត វាជាអំពើខុសច្បាប់ ហើយរាជរដ្ឋាភិបាលគ្មានជម្រើសអ្វីផ្សេងក្រៅពីការចាត់វិធានការឆ្លើយតបតាមផ្លូវច្បាប់ឡើយ ។ លើសពីនេះ បុរសខ្លាំងបានព្រមានគួរឲ្យភ្ញាក់ផ្អើល និងងឿងឆ្ងល់ទៀតថា បើបាតុកម្មណាមួយប៉ះពាល់ដល់ការបំផ្លាញសន្តិសុខជាតិ គឺក្រុមបាតុករត្រូវប្រុងប្រយ័ត្នទៅនឹង"បាតដៃទី៣" ។

មជ្ឈដ្ឋានទូទៅកំពុងសម្តែងនូវការងឿងឆ្ងល់ថា តើពាក្យ"បាតដៃទី៣" ដែលជាពាក្យសម្តីព្រមានរបស់បុរសខ្លាំងនោះមានន័យយ៉ាងដូចម្តេច ? អ្នកខ្លះវិភាគថា "បាតដៃទី៣" នេះគឺបុរសខ្លាំងចង់បញ្ជាក់ថា នឹងអាចប្រើប្រាស់កម្លាំងបាតុករធ្វើមហាបាតុកម្មប្រឆាំងក្រុមបាតុកររបស់គណបក្សសង្គ្រោះជាតិវិញ ។ អ្នកខ្លះទៀតថា បុរសខ្លាំងអាចនឹងប្រើប្រាស់កម្លាំងប្រដាប់អាវុធបង្ក្រាបទៅលើក្រុមបាតុករដឹកនាំដោយគណបក្សប្រឆាំង ។

ឆ្លើយតបភ្លាមៗទៅនឹងការអះអាងរបស់បុរសខ្លាំងដែលថា មិនអាចរំលាយសភា និងមិនអាចបោះឆ្នោតសាជាថ្មីឡើងវិញបាន ព្រោះផ្ទុយនឹងរដ្ឋធម្មនុញ្ញនោះ ឯកឧត្តម សម រង្ស៊ី ប្រធានគណបក្សសង្គ្រោះជាតិ បានបញ្ជាក់ថា ចុះរឿងលួចបន្លំសន្លឹកឆ្នោតមិនបានចែងនៅក្នុងរដ្ឋធម្មនុញ្ញ និងនៅក្នុងច្បាប់ស្តីពីការបោះឆ្នោតឯណា ហេតុអ្វីក៏មានគណបក្សខ្លះអាចលួចបន្លំសន្លឹកឆ្នោតបាន ។

សង្គមស៊ីវិលមួយចំនួនបានអះអាងថា ប្រសិនបើមានការបង្ក្រាបពីរាជរដ្ឋាភិបាលមកលើក្រុមបាតុករកំពុងធ្វើមហាបាតុកម្មដឹកនាំដោយគណបក្សប្រឆាំងនោះ គឺអន្តរជាតិអាចនឹងលូកដៃចូលអន្តរាគមន៍ដោះស្រាយវិបត្តិនយោបាយនៅកម្ពុជា ។

មជ្ឈដ្ឋានអ្នកវិភាគនយោបាយឯករាជ្យនៅកម្ពុជា បានលើកឡើងថា បុរសខ្លាំងនៅតែបន្តមើលមិនឃើញនូវកំហុសឆ្គងរបស់ខ្លួនក្នុងការដឹកនាំប្រទេសអស់រយៈពេលជាង២០ឆ្នាំមកហើយនោះទេ ទើបបុរសខ្លាំងបានលាន់មាត់ថា "តើខ្ញុំបានធ្វើកំហុសអ្វីទើបទាមទារឲ្យខ្ញុំចុះចេញពីតំណែង ?" ៕

CNRP-17

Source from: www.dtn7.com