ខេត្តឧត្តរមានជ័យ៖ករណីឧកញ៉ាលឹមហេងចាក់ដីលុបលេណដ្ឋានកងទ័ពការពារព្រំដែនលើខ្នងភ្នំដងរែកនៃតំបន់ជប់គគីរ ខេត្តឧត្តរមានជ័យ ៖ ករណីឧកញ៉ា លឹម ហេង ចាក់ដីលុបលេណដ្ឋានកងទ័ព ការពារព្រំដែនលើខ្នងភ្នំដងរែក នៃតំបន់ជប់គគីរ ឃុំអម្ពិល ស្រុកបន្ទាយអម្ពិល ខេត្តឧត្តរមានជ័យ ដើម្បីសាងសង់កាស៊ីណូ កំពុងទទួលរង នូវការរិះគន់យ៉ាងខ្លាំងក្លា សូម្បីតែមន្ត្រីយោធាជាន់ខ្ពស់ ក៏បញ្ចេញប្រតិកម្មចំពោះទង្វើរបស់ ឧកញ៉ា លឹម ហេង ផងដែរ។ គេចាំមើលថា តើក្រសួងការពារជាតិ និងស្ថាប័នពាក់ព័ន្ធ ចាត់វិធានការ បែបណាទៅលើឧកញ៉ា លឹម ហេង ដែលធ្វើសកម្មភាព ចាក់ដីលុបលេណដ្ឋានកងទ័ព សាងសង់កាស៊ីណូ ដើម្បីបម្រើផលប្រយោជន៍ផ្ទាល់ខ្លួន។ ប្រសិនបើគេបណ្តោយឱ្យឧកញ៉ា លឹម ហេង ធ្វើអ្វីៗស្រេចតែអំពើចិត្តនោះ មានន័យថាគឺជាការបើកដៃ ឱ្យមេឈ្មួញរូបនេះបំផ្លាញ ផលប្រយោជន៍ជាតិខ្មែរទាំងមូល យ៉ាងគួរឱ្យស្អប់ខ្ពើម។
មេបញ្ជាការគ្រប់គ្រងយោធា ការពារព្រំដែន ខេត្តឧត្តរមានជ័យ បានបញ្ចេញប្រតិកម្មយ៉ាងខ្លាំងក្លា ចំពោះគម្រោង សាងសង់កាស៊ីណូមួយកន្លែង នៅជាប់ព្រំដែនកម្ពុជា-សៀម ក្នុងតំបន់ជប់គគីរ លើខ្នងភ្នំដងរែក ឃុំអម្ពិល ស្រុកបន្ទាយអម្ពិល បន្ទាប់ពីមេឈ្មួញ លឹម ហេង ប្រើគ្រឿងចក្រឈូសឆាយ លុបលេណដ្ឋាន របស់កងទ័ពមួយចំនួន ធ្វើឱ្យកងទ័ពគ្មានទីតាំង ឈរជើងការពារព្រំដែន។ ទង្វើរបស់មេឈ្មួញ លឹម ហេង ធ្វើឱ្យប៉ះពាល់យ៉ាងខ្លាំង ដល់ប្រយោជន៍ជាតិខ្មែរទាំងមូល ដូច្នេះលោក ទៀ បាញ់ រដ្ឋមន្ត្រីក្រសួងការពារជាតិ និងនាយឧត្តមសេនីយ៍ ប៉ុល សារឿន អគ្គមេបញ្ជាការ នៃកងយោធពលខេរមភូមិន្ទ ត្រូវចាត់វិធានការទប់ស្កាត់ ជាបន្ទាន់ផងដែរ។ លោក ទៀ បាញ់ ជាអ្នកទទួលខុសត្រូវធំជាងគេប្រសិនបើឈ្មួញ លឹម ហេង អាចបំផ្លាញលេណដ្ឋាន របស់កងទ័ពនៅតាមព្រំដែន ស្រេចតែអំពើចិត្ត របស់ខ្លួនតទៅទៀត។
អគ្គមេបញ្ជាការរង នៃកងយោធពលខេមរភូមិន្ទ ទទួលបន្ទុកទិសឧត្តរមានជ័យ គឺលោក ឈិន ច័ន្ទពណ៌ បានអះអាងកាលពីថ្ងៃទី១៧ ខែធ្នូ កន្លងទៅនេះថា លោកមិនពេញចិត្ត ចំពោះគម្រោងសាងសង់កាស៊ីណូ ដែលបានចាក់ដីលុបលេណដ្ឋានយោធា ដែលកំពុងប្រចាំការ ការពារបូរណភាពទឹកដីនោះទេ ព្រោះតំបន់ដែលគេ មានគម្រោងសាងសង់កាស៊ីណូនោះ គឺជាចំណុចក្តៅ ក្នុងរឿងជម្លោះព្រំដែន ខ្មែរ-សៀម ដែលកន្លងមកកងទ័ពខ្មែរ បានប្រឹងប្រែងការពារ តំបន់នោះយ៉ាងខ្លាំង។ លោក ឈិន ច័ន្ទពណ៌ បានជំរុញឱ្យឧកញ៉ា លឹម ហេង ពិចារណាឡើងវិញ ព្រោះទង្វើនោះគឺជា កំហុសឆ្គងធ្ងន់ធ្ងរណាស់ ដូចដែលមន្ត្រីយោធា ឈរជើងតាមតំបន់ព្រំដែន ក្នុងឃុំអម្ពិល ស្រុកបន្ទាយអម្ពិល ខេត្តឧត្តរមានជ័យ បានអះអាងថាឧកញ៉ា លឹម ហេង ត្រូវដកថយជាបន្ទាន់ ពីតំបន់នោះ។
ក្រុមមន្ត្រីយោធាបានបញ្ជាក់ថា ការដែលឧកញ៉ាលឹម ហេង លុបលេណដ្ឋានកងទ័ព ការពារព្រំដែន គឺជាអំពើមិនត្រឹមត្រូវឡើយ ហើយជារឿងដែលយោធា មិនអាចទទួលយកបាន ជាដាច់ខាត។ ប្រតិកម្មរបស់មន្ត្រីយោធាបែបនេះ គេមិនដឹងថាឧកញ៉ា លឹម ហេង ត្រូវដកថយឬយ៉ាងណានោះឡើយ ព្រោះអីបើតាមដឹង ឧកញ៉ា លឹម ហេង មានឥទ្ធិពលខ្លាំងសម្បើមណាស់។ លោក ទៀ បាញ់ ក្នុងនាមជារដ្ឋមន្ត្រីក្រសួងការពារជាតិ មិនត្រូវព្រងើយកន្តើយ ចំពោះបញ្ហានេះទេ ព្រោះទីតាំងដែលឧកញ៉ា លឹម ហេង គ្រោងសាងសង់កាស៊ីណូនោះ គឺជាកន្លែងឈរជើង ដ៏សំខាន់បំផុត របស់កងទ័ពខ្មែរ ព្រោះការអនុញ្ញាតឱ្យឈ្មួញបំផ្លាញលេណដ្ឋាន ការពារព្រំដែនរបស់យោធា តាមអំពើចិត្តមិនមែនជារឿងល្អឡើយ៕
Source from: watphnom-news.com
Loading...
Post a Comment