ខេត្តកណ្តាល៖ប្រភពរាយការណ៍ពីប្រជាពលរដ្ឋរស់នៅក្នុងឃុំព្រែកអំបិលស្រុកស្អាងខេត្តកណ្តាលបានឲ្យដឹងថាកាលពីថ្ងៃទី០៨ខេត្តកណ្តាល ៖ ប្រភពរាយការណ៍ពីប្រជាពលរដ្ឋ រស់នៅក្នុងឃុំព្រែកអំបិល ស្រុកស្អាង ខេត្តកណ្តាល បានឲ្យដឹងថា កាលពីថ្ងៃទី០៨ ខែធ្នូ ឆ្នាំ២០១៣ លោក ផុន ចេតនា មន្ត្រីជលផលចតុមុខ បានចុះធ្វើការបង្ក្រាប បទល្មើសនេសាទ នៅចំណុចព្រែកកូនជ្រេរ និងព្រែកគ្រួស ក្នុងឃុំព្រែកអំបិល ស្រុកស្អាង ខេត្តកណ្តាល ដោយពុំបានសហការជាមួយ អាជ្ញាធរមូលដ្ឋាននោះទេ ហើយគាបជំរិតឲ្យប្រជាពលរដ្ឋ បង់លុយតាម របៀបឆៅៗតែម្តង។
ក្នុងប្រតិបត្តិការនោះលោក ផុន ចេតនា បានរឹបអូសឧបករណ៍ នេសាទខុសច្បាប់ ដូចជាដាយបានចំនួន ៧មាត់ ដែលមានម្ចាស់ ទី១-ឈ្មោះ អាន ទី២-ឈ្មោះ នឹម ទី៣-ឈ្មោះ ផេង ទី៤-ឈ្មោះ ណេរ ទី៥-ឈ្មោះ ធី ទី៦-ឈ្មោះ ហុក ទី៧-ឈ្មោះ កៅ ហើយបានយកវត្ថុតាងទាំងនេះ ទៅដាក់លាក់ទុកនៅចំណុច ស្ពានព្រែកស៊ាងលី ក្នុងឃុំកោះខែល ដើម្បីកោះហៅម្ចាស់ដាយ ទាំងអស់នោះមកធ្វើការដោះស្រាយ តាមរយៈការបង់លុយ ឲ្យពួកគេនៅក្នុងថ្ងៃដដែលនោះ ។
ក៏ប៉ុន្តែមានតែម្ចាស់ដាយចំនួន ៤នាក់ទេ ដែលមានលុយមកធ្វើការដោះស្រាយ ជាមួយលោក ផុន ចេតនា រួមមាន ឈ្មោះ នឹម ឈ្មោះ ផេង ឈ្មោះ ណេរ និងឈ្មោះ ធី ដែលនៅពេលនោះលោក ផុន ចេតនា បានទាមទារឲ្យម្ចាស់ដាយ ត្រូវបង់លុយក្នុងដាយ ១មាត់ចំនួន ៣៥០ដុល្លារ ជាថ្នូរនឹងការដោះលេង និងប្រគល់ឧបករណ៍នេសាទល្មើសច្បាប់ ឲ្យវិញដោយរលូន នៅល្ងាចថ្ងៃទី០៨ ខែធ្នូ ឆ្នាំ២០១៣ ។
ចំណែកដាយនៅសល់ចំនួន ៣មាត់ទៀតដែលម្ចាស់ មិនមានលុយបង់ គឺលោក ផុន ចេតនា បានធ្វើរបាយការណ៍ ជូនមកឲ្យថ្នាក់លើ រួមទាំងវត្ថុតាងជាដើម ដើម្បីបង្ហាញពីស្នាដៃ ពីការចុះបង្ក្រាបយកបុងជាមួយថ្នាក់លើ។ ប្រជាពលរដ្ឋទូទាំង ឃុំព្រែកអំបិល បានរិះគន់យ៉ាងខ្លាំង ចំពោះលោក ផុន ចេតនា មន្ត្រីជលផលចតុមុខ ដែលបង្ក្រាបបទល្មើស មិនស្មើភាពគ្នា ដែលភាគច្រើនធ្វើតែ ចំពោះប្រជាពលរដ្ឋក្រីក្រ។
ប្រជាពលរដ្ឋបានរៀបរាប់ថា ការធ្វើនេសាទដោយ ប្រើប្រាស់ឧបករណ៍ដាក់ដាយដូចគ្នា បើនិយាយពីខុសច្បាប់នោះ គឺវាខុសដូចតែគ្នា ហេតុអ្វីបានជាលោក ផុន ចេតនា ដើរចាប់ឃាត់ រឹបអូសយកតែរបស់ប្រជាពលរដ្ឋក្រីក្រ ដែលមិនបានបង់លុយ ចំណែកដាយដែលគេបង់លុយ ទៅតាមការទាមទារ គឺលោក ផុន ចេតនា បែរជាមិនចាត់វិធានការបង្ក្រាប សូម្បីតែបើកទូកទៅក្បែរ ក៏មិនហ៊ានផង។
រឿងរ៉ាវដែលលោក ផុន ចេតនា កំពុងតែអនុវត្ត និងដើរប្រមូលលុយ ពីប្រជានេសាទតាមព្រែក និងបឹង ទន្លេ យកទៅធ្វើមានធ្វើបានផ្ទាល់ខ្លួន យ៉ាងអនាធិបតេយ្យបែបនេះ តើលោក ម៉ែន វិបុល ប្រធានក្រុមបង្ក្រាប ជលផលចតុមុខ បានដឹងឬក៏ដឹងហើយ ធ្វើជាមិនដឹង។ ពីព្រោះលោក ផុន ចេតនា តែងតែអះអាងថា គាត់ធ្វើអ្វីគ្រប់បែបយ៉ាង ដើម្បីប្រមូលយកទៅឲ្យលោក មែន វិបុល ជាមេក្រុមរបស់គាត់តែប៉ុណ្ណោះ។
ប្រជាពលរដ្ឋបានរអ៊ូររទាំយ៉ាងខ្លាំង ពីទង្វើរបស់លោក ផុន ចេតនា ដែលដើរចាប់ជំរិតទារលុយ ពីប្រជានេសាទតាមតែទំនើងចិត្ត ដោយគ្មានការយោគយល់ ដល់ប្រជាពលរដ្ឋក្រីក្រ រកស៊ីនេសាទត្រី តាមលក្ខណៈគ្រួសារបន្តិចបន្តួច សំរាប់ចិញ្ចឹមជីវិតប្រចាំថ្ងៃនោះទេ ដែលសកម្មភាពបែបនេះ បានជះឥទ្វិពលមិនល្អ បណ្តាលឲ្យគណបក្សប្រជាជន ចាញ់ឆ្នោតនាពេលកន្លងមក។
លោកផុន ចេតនា តែងតែប្រើអំណាច ដើរប្រមូលលុយពីបទល្មើស នេសាទខុសច្បាប់ចំនួនពីរខេត្តគឺ ខេត្តតាកែវ និងខេត្តកណ្តាល ក្នុងមួយរដូវៗបានលុយ រាប់ម៉ឺនដុល្លារអាមេរិក។ ប្រជាពលរដ្ឋនៅទូទាំងខេត្តកណ្តាល និងតាកែវ សូមសំណូមពរដល់ លោក ឯកឧត្តម អ៊ុក រ៉ាប៊ុន រដ្ឋមន្ត្រីក្រសួង កសិកម្មរុក្ខាប្រម៉ាញ់និងនេសាទ មេត្តាចាត់កំលាំងពិសេស ចុះពិនិត្យនិងស្រាវជ្រាវ ភាពអសកម្មរបស់លោកផុន ចេតនា ឡើងវិញផង។
ពាក់ព័ន្ធនិងករណីរិះគន់លោក ផុន ចេតនា និងលោក ម៉ែន វិបុល ប្រធានក្រុមបង្ក្រាប បទល្មើសជលផលចតុមុខ ប្រចាំការនៅខេត្តតាកែវ និងខេត្តកណ្តាល ដូចខាងលើនេះ កាសែតវត្តភ្នំ ព្យាយាមធ្វើការទំនាក់ទំនង តាមទូរស័ព្ទទៅលោក ម៉ែន វិបុល ដើម្បីសុំការបំភ្លឺអំពីបញ្ហារិះគន់ និងជំរិតទារប្រាក់ពីពួកគាត់ថា យកទៅជូនថ្នាក់លើ ក៏ប៉ុន្តែពុំអាចទាក់ទងបានឡើយ៕ ដោយ ព្រះច័ន្ទ
Source from: watphnom-news.com
Loading...
Post a Comment