រាជធានីភ្នំពេញ ៖ បុរសម្នាក់ត្រូវកម្លាំងនគរបាល ក្រសួងមហាផ្ទៃ ឃាត់ខ្លួនបញ្ជូនទៅកាន់ សាលាដំបូងរាជធានីភ្នំពេញ កាលពីព្រឹកថ្ងៃទី១០ ខែធ្នូ ឆ្នាំ២០១៣ បន្ទាប់ពីទទួលបានពាក្យបណ្តឹង ពីករណីឆបោកប្រាក់ ហើយព្យាយាមគេចខ្លួនមិនព្រមចូលទៅ ដោះស្រាយបញ្ហា និងបំភ្លឺតាមការកោះហៅ របស់សមត្ថកិច្ច។
ជនឆបោកដែលត្រូវ ឃាត់ខ្លួនមានឈ្មោះ វ៉ែន ថាត ត្រូវបានសាកសួរ ដោយលោកស្រី ព្រះរាជអាជ្ញារង សឿង វន្នី។ ករណីឃាត់ខ្លួនលោក វ៉ែន ថាត បានធ្វើឡើង ដោយយោងទៅតាម ពាក្យបណ្តឹងមួយច្បាប់ ដែលសមត្ថកិច្ច មិនបានបញ្ជាក់ឈ្មោះដើមបណ្តឹង ពាក់ព័ន្ធទៅនឹងការលក់ដីមួយប្លង់ តម្លៃ ប្រមាណ ១៥.០០០ ដុល្លារ ស្ថិតនៅក្នុងភូមិម័រ សង្កាត់-ខណ្ឌដង្កោ។
មានការរំលឹកផងដែរថា អំឡុងខែមេសា ឆ្នាំ២០១៣ លោក វ៉ែន ថាត បានទៅនិយាយលក់ដីមួយប្លង់ ទំហំប្រមាណ ១០ម៉ែត្រ គុណ ២៥ម៉ែត្រ ក្នុងតម្លៃ ១៥.០០០ដុល្លារ។ ក្រោយនិយាយគ្នាហើយ ដើមបណ្តឹងដែលជាភាគីអ្នកទិញនោះ បានកក់លុយចំនួន ២ពាន់ដុល្លារ ដើម្បីឲ្យលោក វ៉ែន ថាត យកទៅរត់ការបញ្ជាក់ ពីអាជ្ញាធរមូលដ្ឋាន អស់ជាច្រើនខែ មិនឃើញលទ្ធផលអ្វីសោះ។
ដើមបណ្តឹងបានចុះ ទៅសួរនាំមន្ត្រីអាជ្ញាធរមូលដ្ឋាន ទើបដឹងថា ដីដែលលោក វ៉ែន ថាត បំរុងយកទៅលក់នោះ ជាដីរបស់រដ្ឋមិនមែនជា កម្មសិទ្ធិរបស់លោក វ៉ែន ថាត នោះឡើយ។ ពេលដឹងរឿងពិត ដើមបណ្តឹងបានដកខ្លួនថយ ហើយព្យាយាមទាក់ទងលោក វ៉ែន ថាត ឲ្យមកចរចាដោះ ស្រាយ និងទារឲ្យសងលុយកក់មកវិញ។ លោក វ៉ែន ថាត បានសងលុយត្រឹមតែ ៨០០ដុល្លារប៉ុណ្ណោះ នៅសល់ ១.២០០ដុល្លារ លោក វ៉ែន ថាត ចេះតែគេចមុខមិនព្រម ចូលដោះស្រាយ ទើបឈានដល់ការដាក់ពាក្យបណ្តឹង ឃាត់ខ្លួនតែម្តង៕
Source from: watphnom-news.com
Loading...
Post a Comment