ខេត្តកណ្តាល ៖ ប្រជាពលរដ្ឋបានរអ៊ូរទាំ និងរិះគន់យ៉ាងខ្លាំងទៅលើលោក ខឹម វិចិត្រា ប្រធាននគរបាលអន្តោប្រវេសន៏ ប្រចាំច្រកទ្វារព្រំដែន ទ្វេភាគីខ្នាតាំងយូរជ្រៃធំ ក្នុងការជំរិតទារលុយ ពីពួកគាត់យ៉ាងច្រើន នៅពេលដែលពួកគាត់ធ្វើដំណើរ ឆ្លងកាត់ព្រំដែនទៅប្រទេសវៀតណាម ដូចជាទៅទិញទំនិញបន្តិចបន្តួច យកមកប្រើប្រាស់ប្រចាំគ្រួសារ តែងតែជួបផលលំបាកយ៉ាងខ្លាំង ដោយសារតែមន្ត្រីនគរបាល អន្តោប្រវេសន៏ប្រចាំច្រកនេះ កំណត់ឲ្យអ្នកដំណើរ ចូលបង់លុយ ទៅតាមការកំណត់ ក្នុងម្នាក់ចាប់ពី ២ម៉ឺនទៅ៣ម៉ឺន រៀលទើបអាចឆ្លងដែនបាន។
ចំណែកប្រជាពលរដ្ឋដែលមានជំងឺ ត្រូវឆ្លងកាត់ព្រំដែន ទៅពិនិត្យព្យាបាល នៅប្រទេសវៀតណាម គឺត្រូវបានលោក ខឹម វិចិត្រា បង្ខំឲ្យពលរដ្ឋទាំងនោះ បង់លុយជូនពួកគេជាមុនសិន ទើបអនុញ្ញាតិឲ្យឆ្លងដែន ដោយកំណត់ឲ្យបង់លុយចាប់ពី ៣០ម៉ឺនទៅ៤០ម៉ឺនរៀល ជាថ្នូរនឹងការចេញលិខិតបញ្ជាក់ សម្រាប់ការឆ្លងដែន។ ប្រសិនបើក្រុមគ្រួសារក្រីក្រ មានជំងឺមិនមានលុយ បង់ឲ្យពួកគេទេនោះ គឺពួកគេចាប់ឃាត់ឬបង្កបញ្ហា មិនឲ្យឆ្លងដែន ទៅព្យាបាលនៅប្រទេស វៀតណាមជាដាច់ខាត ដោយពួកគេរកលេសនេះគ្រប់បែបយ៉ាង ហើយជូនកាល កូនចៅលោក ខឹម វិចិត្រា ដេញឲ្យពលរដ្ឋក្រីក្រទាំងនោះ ឲ្យមកធ្វើលិខិតស្នាម ពីថ្នាក់លើផងដែរ។
ប្រជាពលរដ្ឋបានលើកឡើងថា លោក ខឹម វិចិត្រា ប្រធាននគរបាល អន្តោប្រវេសន៍ប្រចាំ ច្រកទ្វារព្រំដែនខ្នាតាំងយូរជ្រៃធំនេះ បានបញ្ជាឲ្យមន្ត្រីនគរបាល អន្តោប្រវេសន៍នៅក្រោម ការគ្រប់គ្រងរបស់ខ្លួន ត្រូវធ្វើការត្រួតពិនិត្យ ចំពោះអ្នកធ្វើដំណើរដែលគ្មាន លិខិតស្នាមឆ្លងដែន ដោយចាប់ឃាត់ និងបង្ខំឲ្យពួកគាត់ចូលបង់លុយ ។ ចំណែកអ្នកដែលត្រឡប់ មកពីព្យាបាលជំងឺនៅ ប្រទេសវៀតណាមវិញ ក៏ត្រូវបង់លុយចំនួនម្នាក់ ២០ដុល្លារអាមេរិកផងដែរ ហើយបើតាមគោលការណ៍ របស់ថ្នាក់លើគឺមិនអនុញ្ញាត ឲ្យមន្ត្រីនគរបាលអន្តោប្រវេសន៍ ប្រចាំការតាមច្រកទ្វារព្រំដែន គាបជំរិតប្រជាពលរដ្ឋនោះទេ។
យ៉ាងណាក៏ដោយលោក ខឹម វិចិត្រា បានអនុវត្តផ្ទុយពីបទបញ្ជា របស់ថ្នាក់លើយ៉ាងគឃ្លើនបំផុត ពីព្រោះលោក ខឹម វិចិត្រា ធ្វើអ្វីៗគ្រប់បែបយ៉ាង ដើម្បីតែប្រយោជន៍ផ្ទាល់ខ្លួន តែប៉ុណ្ណោះ។ គួររំលឹកថា ក្រៅពីការ ប្រព្រឹត្តអំពើពុករលួយលើការ គាបជំរិតលុយពីអ្នកធ្វើដំណើរ ឆ្លងកាត់ព្រំដែននោះ លោក ខឹម វិចិត្រា ក៏បានចាត់តាំងឲ្យកូនចៅ ប្រុមូលលុយតាមរបៀបពុករលួយ ជាពិសេសគឺរថយន្តដឹកជញ្ជូនទំនិញ គ្រប់ប្រភេទដែលត្រូវឆ្លងកាត់ព្រំដែន ដូចជាការដឹកជញ្ជូនឈើខុសច្បាប់តែម្តង។ ជាក់ស្តែងសកម្មភាពដឹកជញ្ជូនទំនិញ មួយចំនួនដែលជ្រកក្រោមរូបភាព ទំនិញបង់ពន្ធមិនប្រក្រតី ដែលត្រូវដឹកជញ្ជូនឆ្លងកាត់ តាមច្រកទ្វារព្រំដែន ខ្នាតាំងយូរជ្រៃធំ បានដោយរលូននោះ គេសង្ស័យថា លោក ខឹម វិចិត្រា ពិតជាទទួលបាន ផលប្រយោជន៏យ៉ាងច្រើនសន្ធឹកសន្ធាប់។
ប្រជាពលរដ្ឋរស់នៅក្នុង ស្រុកស្អាងនិងស្រុកកោះធំ បានសំណូមពរដល់លោក អ៊ាវ ចំរើន ស្នងការនគរបាលខេត្តកណ្តាល មេត្តាចុះពិនិត្យនិងស្រាវជ្រាវ ពីអំពើពុករលួយរបស់លោក ខឹម វិចិត្រា ឡើងវិញផង ដើម្បីឲ្យប្រជាពលរដ្ឋមានជំនឿ ទៅលើការកែទម្រង់ របស់រាជរដ្ឋាភិបាល។ ពាក់ព័ន្ធនឹងបញ្ហាដែលប្រជាពលរដ្ឋ រិះគន់ដូចខាងលើនេះ កាសែតវត្តភ្នំ ព្យាយាមទំនាក់ទំនង ដើម្បីសុំការបំភ្លឺពីលោក ខឹម វិចិត្រា ក៏ប៉ុន្តែពុំមានប្រភពណា ទាក់ទងបានឡើយ៕ ដោយ ព្រះច័ន្ទ
Source from: watphnom-news.com
Loading...
Post a Comment