គណបក្សជាតិនិយមសុំការបញ្ជាក់ពីទូតអាមេរិកករណីផ្លូវជាតិលេខ៤ធ្លាក់ក្នុងកណ្តាប់ដៃឧកញ៉ា អ៊ឹង ប៊ុនហ៊ូវ នាយកក្រុមហ៊ុន AZ ប្រមូលលុយ
កាលពីថ្ងៃទី១៩ ខែមីនា ឆ្នាំ២០១៤ លោក មុត ចន្ថា អគ្គលេខាធិការគណបក្សជាតិនិយម បានធ្វើលិខិតផ្លូវការមួយច្បាប់ជូនឯកឧត្តម William E.Todd ឯកអគ្គរដ្ឋទូតសហរដ្ឋអាមេរិកប្រចាំព្រះរាជាណាចក្រកម្ពុជា ស្នើសុំឲ្យមានការបំភ្លឺបញ្ជាក់លើករណីសម្បទានផ្លូវជាតិលេខ៤ ដែលស្ថាបនានិងជួសជុលឡើងវិញដោយរដ្ឋាភិបាលសហរដ្ឋអាមេរិក បែរជាក្រុមហ៊ុន AZ Distribution មានលោកឧកញ៉ា អ៊ឹង ប៊ុនហ៊ូវ ជានាយក មានសិទ្ធិប្រមូលលុយពីរថយន្តក្រុមហ៊ុន និងប្រជាពលរដ្ឋឆ្លងកាត់ផ្លូវជាតិទៅវិញ តាមរយៈរាជរដ្ឋាភិបាលកម្ពុជា តំណាងដោយក្រសួងសាធារណការនិងដឹកជញ្ជូន និងក្រសួងសេដ្ឋកិច្ចនិងហិរញ្ញវត្ថុ ចុះកិច្ចព្រមព្រៀងសម្បទានជាមួយក្រុមហ៊ុនឯកជនឈ្មោះ AZ Distribution Co., Ltd. ។
សូមរំលឹកជូនថា ដោយមានការផ្តល់យោបល់របៀបជួយជ្រោមជ្រែងយ៉ាងពេញទំហឹងពីសំណាក់មន្ត្រីសំខាន់ៗចំនួន៣នាក់ នៅលើសំណើចុះថ្ងៃទី២៦ ខែមេសា ឆ្នាំ២០០០ របស់លោកឧកញ៉ា អ៊ឹង ប៊ុនហ៊ូវ នាយកក្រុមហ៊ុន AZ Distribution Co., Ltd. ស្នើសុំធ្វើសេវាកម្មនៅតាមបណ្តោយផ្លូវជាតិលេខ៤ រួមមាន ៖ ១-ឯកឧត្តមបណ្ឌិតសភាចារ្យ សុខ អាន អតីតទេសរដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី(បច្ចុប្បន្នជាឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី) ២-ឯកឧត្តមបណ្ឌិត អូន ព័ន្ធមុនីរ័ត្ន អតីតទីប្រឹក្សាសម្តេចនាយករដ្ឋមន្ត្រី និងជាអគ្គលេខាធិការក្រសួងសេដ្ឋកិច្ចនិងហិរញ្ញវត្ថុ (បច្ចុប្បន្នជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ) និង៣-ឯកឧត្តម ត្រាំ អ៊ីវតឹក អតីតរដ្ឋលេខាធិការក្រសួងសាធារណការនិងដឹកជញ្ជូន (បច្ចុប្បន្នជារដ្ឋមន្ត្រីក្រសួងសាធារណការនិងដឹកជញ្ជូន) ព្រមទាំងមានចំណារឯកភាពចុះថ្ងៃទី១៥ ខែកុម្ភៈ ឆ្នាំ២០០១ ពីសំណាក់សម្តេច ហ៊ុន សែន ជានាយករដ្ឋមន្ត្រីនៃព្រះរាជាណាចក្រកម្ពុជា ទើបរាជរដ្ឋាភិបាលសម្រេចយល់ព្រមអនុញ្ញាតឲ្យក្រុមហ៊ុន AZ Distribution Co., Ltd. ធ្វើវិនិយោគ និងចុះហត្ថលេខាលើកិច្ចព្រមព្រៀងសម្បទានសម្រាប់គម្រោងសេវាកម្មជួសជុល ថែទាំផ្លូវជាតិលេខ៤ តាមស្មារតីលិខិតលេខ១៨៣សជណ ចុះថ្ងៃទី១៦ ខែកុម្ភៈ ឆ្នាំ២០០១ របស់ទីស្តីការគណៈរដ្ឋមន្ត្រី ។ លើសពីនេះ រាជរដ្ឋាភិបាលបានប្រគល់សិទ្ធិជូនឯកឧត្តម ត្រាំ អ៊ីវតឹក និងឯកឧត្តម អ៊ុត ឈន អតីតអនុរដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ (បច្ចុប្បន្នជាសមាជិកក្រុមប្រឹក្សាធម្មនុញ្ញ បន្ទាប់ពីធ្លាប់បានេះធ្វើជាអគ្គសវនករនៃអាជ្ញាធរសវនកម្មជាតិ) នូវសិទ្ធិពេញសមត្ថភាពដើម្បីចុះហត្ថលេខាលើកិច្ចសន្យារវាងរាជរដ្ឋាភិបាលនៃព្រះរាជាណាចក្រកម្ពុជា ជាមួយក្រុមហ៊ុន AZ Distribution Co., Ltd. តាមលិខិតសិទ្ធិប្រទានលេខ០៨ស.ប្រ.ទ ចុះថ្ងៃទី១៦ ខែកុម្ភៈ ឆ្នាំ២០០១ ។
ក្រោយមក នៅថ្ងៃទី២៨ ខែមីនា ឆ្នាំ២០០១ ទើបកិច្ចព្រមព្រៀងសម្បទានរវាងរាជរដ្ឋាភិបាលនៃព្រះរាជាណាចក្រកម្ពុជា និងក្រុមហ៊ុន AZ Distribution Co., Ltd. លើការធ្វើសេវាកម្មផ្លូវជាតិលេខ៤រយៈពេល៣៥ឆ្នាំ មានចំនួន២១ប្រការ បានកើតចេញជារូបរាងឡើង ។
រាជរដ្ឋាភិបាលកម្ពុជាអាណត្តិទី២ ដែលមានបុរសខ្លាំងជានាយករដ្ឋមន្ត្រី ធ្លាប់បានបកស្រាយបំភ្លឺទៅនឹងសំណើសុំលុបចោលកិច្ចព្រមព្រៀងរវាងរាជរដ្ឋាភិបាល និងក្រុមហ៊ុន AZ Distribution Co., Ltd. លើការធ្វើសេវាកម្មយកលុយផ្លូវជាតិលេខ៤នាអំឡុងដើមឆ្នាំ២០០១ របស់អ្នកតំណាងរាស្ត្រគណបក្សប្រឆាំងថា "កិច្ចសន្យារវាងរាជរដ្ឋាភិបាល និងក្រុមហ៊ុន AZ Distribution Co., Ltd. ស្តីពីការជួសជុល ថែទាំផ្លូវជាតិលេខ៤នេះ ជាទិដ្ឋភាពថ្មីមួយទៀតនៃការងារអភិបាលកិច្ច ហើយក៏ជាការសម្តែងឲ្យឃើញនូវការប្តេជ្ញាចិត្តរបស់រាជរដ្ឋាភិបាលក្នុងកិច្ចការអភិវឌ្ឍន៍ប្រទេសជាតិ ក្នុងពេលដែលរដ្ឋពុំមានថវិកាគ្រប់គ្រាន់ដើម្បីអនុវត្តន៍ការងារ ។ " ។
គិតរហូតមកទល់សព្វថ្ងៃនេះ ក្រុមហ៊ុន AZ Distribution Co., Ltd. របស់លោកឧកញ៉ា អ៊ឹង ប៊ុនហ៊ូវ ធ្វើការប្រមូលលុយពីសេវាកម្មផ្លូវជាតិលេខ៤អស់រយៈពេលយ៉ាងតិចចំនួន១២ឆ្នាំហើយៗមានកម្រិតទឹកប្រាក់ខ្ទង់រយលានដុល្លារអាមេរិក ជាមួយមន្ត្រីមានអំណាចធំៗក្នុងគណបក្សប្រជាជនកម្ពុជា ជាពិសេសសម្តេចអគ្គមហាសេនាបតីតេជោ ហ៊ុន សែន ហៅបុរសខ្លាំងជានាយករដ្ឋមន្ត្រី និងឯកឧត្តមបណ្ឌិតសភាចារ្យ សុខ អាន ជាឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាដន្លងដងស្នែងជាមួយបុរសខ្លាំង ។
មជ្ឈដ្ឋានអ្នកច្បាប់ឯករាជ្យនៅកម្ពុជា បានលើកឡើងថា ដោយសារផ្លូវជាតិលេខ៤ត្រូវបានក្រុមហ៊ុនលោកឧកញ៉ា អ៊ឹង ប៊ុនហ៊ូវ ប្រមូលយកលុយពេលរថយន្តបើកបរឆ្លងកាត់ ដូច្នេះ រាជរដ្ឋាភិបាលគប្បីសម្រេចផ្លាស់ប្តូរឈ្មោះផ្លូវជាតិលេខ៤ ទៅជា"ផ្លូវឧកញ៉ា អ៊ឹង ប៊ុនហ៊ូវ "វិញ ទើបសមរម្យជាង ហើយក៏មិនសូវឲ្យប្រជាពលរដ្ឋខឹងសម្បាដែរ ដ្បិតបើហៅផ្លូវជាតិលេខ៤ជាផ្លូវរបស់ជាតិពេលឆ្លងកាត់មិនតម្រូវឲ្យបង់លុយឡើយ ដូចជាផ្លូវជាតិលេខ១, ផ្លូវជាតិលេខ២, ផ្លូវជាតិលេខ៣, ផ្លូវជាតិលេខ៥ និងផ្លូវជាតិលេខ៦…ជាដើម ។ល៕
Source from: www.dtn7.com
Loading...
Post a Comment