មានអ្នករត់ការដោះលែង បុគ្គលិកក្រុមហ៊ុនឡានក្រុងរិទ្ធមុន្នី ដែលប្រើហិង្សាលើសមត្ថកិច្ច
ខេត្តបាត់ដំបង៖លោកជេតវណ្ណនីស្នងការរងកណ្តាលយុត្តិធម៌ខេត្តបាត់ដំបងរងការរិះគន់ពីករណីរត់ការដោះលែងបុរសចំនួនខេត្តបាត់ដំបង ៖ លោក ជេត វណ្ណនី ស្នងការរងកណ្តាលយុត្តិធម៌ ខេត្តបាត់ដំបង រងការរិះគន់ពីករណីរត់ការ ដោះលែងបុរសចំនួន ៥នាក់ ជាបុគ្គលិកក្រុមហ៊ុន រថយន្តក្រុងរិទ្ធមុន្នី ដែលបានប្រើហិង្សាលើ សមត្ថកិច្ចនគរបាល វាយដកយកកាំភ្លើង ធ្វើឲ្យមន្ត្រីជាច្រើនមានការឈឺចាប់ ព្រោះការដោះលែង ជនដែលប្រើហិង្សា លើសមត្ថកិច្ចបែបនេះ មិនសមទំនងនិងសង្ស័យថា មានរឿងរ៉ាវអាថ៌កំបាំង អ្វីមួយហើយមមើលទៅ។
គួរំលឹកផងដែរ ករណីឃាត់ខ្លួនបុរស ៥នាក់ ជាបុគ្គលិកក្រុមហ៊ុន រថយន្តក្រុងរិទ្ធមុន្នី បានកើតឡើងបន្ទាប់ពីពួកគេ បានវាយសមត្ថកិច្ច ដកយកប័ណ្ណសំគាល់ខ្លួន និងកាំភ្លើងខ្លី ១ដើម ពេលចុះអន្តាគមន៍ យុវជន ២នាក់ ដែលខាងក្រុមហ៊ុន ឃាត់ទុកហើយចោទថាជាចោរ កាលពីវេលាម៉ោង ១១យប់ថ្ងៃទី១៤ ខែឧសភា ឆ្នាំ២០១៤ នៅចំណុចបរិវេណ បេនរថយន្តក្រុង ដឹកអ្នកដំណើររិទ្ធិមុន្នី ត្រង់រង្វង់មូលព្រាបស ក្នុងភូមិច្រាបវាល ឃុំអន្លង់វិល ស្រុកសង្កែ ខេត្តបាត់ដំបង។
បុរស ៥នាក់ ដែលសមត្ថកិច្ចឃាត់ខ្លួន រួមមានទី១-ឈ្មោះ ជា ប្រឹក្សា អាយុ ៤២ឆ្នាំ មេការក្រុមហ៊ុន ជាអ្នកបញ្ជារអោយវ៉ៃសមត្ថកិច្ច និងដកកាតនគរបាលទុក មានទីលំនៅ ភូមិឃុំអន្លង់វិល ស្រុកសង្កែ ខេត្តបាត់ដំបង។ ទី២-ឈ្មោះ អ៊ុក សុផល អាយុ ៥២ឆ្នាំ ទីលំនៅភូមិព្រែកតាឡុង ឃុំតាក្តុល ស្រុកតាខ្មៅ ខេត្តកណ្តាល។ ទី៣-ឈ្មោះ យឿម ចាន់តារ៉ា អាយុ ៣៨ឆ្នាំ ទីលំនៅភូមិឃុំស្រែដូនតូច ស្រុកពញាឮ ខេត្តកណ្តាល។ ទី៤-ឈ្មោះ លឹម គឹមសុន អាយុ ៣៧ឆ្នាំ ទីលំនៅភូមិអង់រងា ឃុំទួលអំពិល ស្រុកបសែត ខេត្តកំពង់ស្ពឺ។ ទី៥-ឈ្មោះ ឈីវ ណូ អាយុ ២២ឆ្នាំ របួសធ្ងន់ ទីលំនៅស្រុកស្អាង ខេត្តកណ្តាល។ ទាំង ៥នាក់ ស្រវឹងរងរបួសទាំងអស់គ្នា និងជាបុគ្គលិក របស់ក្រុមហ៊ុនរថយន្តក្រុង ដឹកអ្នកដំណើររិទ្ធមុន្នី ចំពោះអ្នកយកកាំភ្លើងខ្លី បានរត់ចេញក្រៅបាត់។
សមត្ថកិច្ចនគរបាល ក្រោមឱវាទលោក ជេត វណ្ណនី ជាច្រើនការិយាល័យ កាលពីថ្ងៃទី១៦ខែឧសភា ឆ្នាំ២០១៤ បានអោយដឹងថា ពួកគេមានការឈឺចាប់ណាស់ ដោយសារការដោះលែង ជនដែលប្រើហិង្សាលើសមត្ថកិច្ច ហើយថ្នាក់លើជាអ្នករត់ការ ដោះលែងបែបនេះ។ ជាក់ស្តែងនៅយប់កើតហេតុ ពេលដែលសមត្ថកិច្ច ដឹកជនសង្ស័យទាំង ៥នាក់ មកដល់ស្នងការដ្ឋាននគរបាលខេត្ត ក្រុមគ្រូពេទ្យបានពិនិត្យ លើរបួសជនសង្ស័យ ហើយបានបញ្ជាក់ថា ជនសង្ស័យ គឺមានរបួសធម្មតា មិនធ្ងន់ធ្ងរទេ តែមានជាតិស្រាច្រើន ពេលស្វាងស្រា គឺមិនមានអ្វីកើតឡើងទេ។
លុះម៉ោង ៤រសៀលថ្ងៃទី១៥ មានឈ្មោះ ស៊ឹម ជាថៅកែរថយន្ត ក្រុងផារ៉ាម៉ោន និងពីមុនមានភាគហ៊ុន ក្នុងក្រុមហ៊ុនរថយន្តក្រុងរិទ្ធមុន្នី ដែរនិងមានកូនជាជនសង្ស័យ ជាប់ទ្រុងដែរនោះ បានមកការិយាល័យព្រហ្មទ័ណ្ឌកំរិតស្រាល រួចសួររកលោក ជេត វណ្ណនី។ បន្ទាប់មកលោក ស៊ឹម បានយកបបរអោយកូនហូប នៅកន្លែងឃុំឃាំង បានប្រហែល ១៥នាទី កូនលោក ស៊ឹម ដែលជាប់ទ្រុង បានសន្លប់រួចស្នើសុំ យកទៅព្យាបាលនៅមន្ទីរពេទ្យ។ ពាក់ព័ន្ធករណីនេះ ពេលបញ្ជូនក្រុមសង្ស័យទាំង ៥នាក់ និងសំណុំរឿងដល់តុលាការ ត្រូវបានលោក យ៉ាប់ មេត្តាចៅក្រមស៊ើបសួរ និងលោក នួន សាន ព្រះរាជអាជ្ញាកាន់សំណុំរឿង សម្រេចដោះលែងជនសង្ស័យតែម្តង។
មតិនានាមានការរិះគន់យ៉ាងខ្លាំង ទោះជាករណីនេះ នគរបាលរងការចោទថា ចូលកន្លែងក្រុមហ៊ុន គ្មានឯកសណ្ឋានត្រឹមត្រូវក៏ដោយ តែពួកគេបានបង្ហាញប័ណ្ណសំគាល់ខ្លួន ហើយកន្លែងក្រុមហ៊ុន ប្រៀបបានទីសារធារណៈ ព្រោះបើករបង រងចាំបំរើអតិថិជន ២៤ម៉ោង មិនដែលបិទរបងឡើយ។ ក្នុងនាមជាប្រជាពលរដ្ឋល្អ មិនត្រូវវាយជនណាម្នាក់ ដែលគេប្រាប់ពីសាវតាច្បាស់លាស់ និងមានអ្នកមកធានានោះទេ ហើយបើហ៊ានវាយសមត្ថកិច្ចបែបនេះ ជនទាំង ៥នាក់នេះ មានចិត្តឃោរឃៅជាងពួកចោរ ឬពួកប្រព្រឹត្តបទល្មើសទៅទៀត ព្រោះចោរនិងជនពាលឬសូរតែសមត្ថកិច្ច ទោះជាសមត្ថកិច្ចណា ក៏វាដើរជៀសចេញឆ្ងាយ មិនចាំបាច់ដកកាតអោយវាមើលឡើយ។ ដូច្នេះការដោះលែងជនសង្ស័យទាំង ៥នាក់ ដែលវាយសមត្ថកិច្ចនិងយកកាំភ្លើង ១ដើម បានបន្សល់ទុកនូវការឈឺចាប់ និងភាពអស់សង្ឃឹម សម្រាប់មន្ត្រីតូចតាចដែលរងគ្រោះ៕
Source from: watphnom-news.com
Loading...
Post a Comment