ច្បាប់ស្តីពីការលើកលែងទោសចេញមិនរួចអស់រយៈពេលជាង២០ឆ្នាំក្រោមការគ្រប់គ្រងអំណាចដោយបុរសខ្លាំង
មាត្រា៩០ថ្មី(ពីរ) វាក្យខណ្ឌទី៤នៃច្បាប់រដ្ឋធម្មនុញ្ញស្តីពីវិសោធនកម្មមាត្រា៨២, មាត្រា៨៨ថ្មី, មាត្រា៩០ថ្មី, មាត្រា៩៨, មាត្រា១០៦ថ្មី, មាត្រា១១១ថ្មី(មួយ) មាត្រា១១៤ថ្មី នៃរដ្ឋធម្មនុញ្ញ និងមាត្រា៦នៃច្បាប់ធម្មនុញ្ញបន្ថែម សំដៅធានានូវដំណើរការជាប្រក្រតីនៃស្ថាប័នជាតិ បានចែងថា "រដ្ឋសភាអនុម័តច្បាប់ស្តីពីការលើកលែងទោសជាទូទៅ" ។
ថ្វិដ្បិតច្បាប់ធម្មនុញ្ញស្តីពីវិសោធនកម្មនៃរដ្ឋធម្មនុញ្ញបានចែងតម្រូវឲ្យមានច្បាប់ស្តីពីការលើកលែងទោសជាទូទៅ ដែលអនុម័តដោយរដ្ឋសភាក៏ពិតមែន ប៉ុន្តែជាក់ស្តែងរហូតមកទល់នឹងសព្វថ្ងៃ គឺមានរយៈពេលជាង២០ឆ្នាំហើយចាប់តាំងពីរដ្ឋធម្មនុញ្ញជាច្បាប់កំពូលនៃព្រះរាជាណាចក្រកម្ពុជា បានប្រកាសឲ្យប្រើនាថ្ងៃទី២៤ ខែកញ្ញា ឆ្នាំ១៩៩៣នោះ ព្រះរាជាណាចក្រកម្ពុជាទី២ដែលមានសម្តេចអគ្គមហាសេនាបតីតេជោ ហ៊ុន សែន ហៅបុរសខ្លាំង ជានាយករដ្ឋមន្ត្រី មិនទាន់មានច្បាប់ស្តីពីការលើកលែងទោសជាទូទៅនៅឡើយ ពោលបានត្រឹមប្រើក្រឹត្យលេខ២៨ក្រ ចុះថ្ងៃទី២០ ខែមិថុនា ឆ្នាំ១៩៨៨ របស់សាធារណរដ្ឋប្រជាមានិតកម្ពុជា ស្តីពីការលើកលែងទោស និងបន្ធូរបន្ថយទោសដ៏ចាស់គំរិល(២៦ឆ្នាំ)ប៉ុណ្ណោះ ។
ដោយឡែក មាត្រា២៧នៃរដ្ឋធម្មនុញ្ញនៃព្រះរាជាណាចក្រកម្ពុជា បានចែងដែរថា "ព្រះមហាក្សត្រទ្រង់មានព្រះរាជសិទ្ធិបន្ធូរបន្ថយទោស និងលើកលែងទោស" ។ ប៉ុន្តែជាក់ស្តែងអស់រយៈពេលជាង២០ឆ្នាំកន្លងមកនេះ គេមិនដែលបានឃើញព្រះមហាក្សត្រទ្រង់ប្រើប្រាស់សិទ្ធិអំណាចរបស់ទ្រង់ដូចមានបញ្ញត្តិក្នុងរដ្ឋធម្មនុញ្ញត្រាស់បង្គាប់បន្ធូរបន្ថយទោស និងលើកលែងទោសឲ្យទណ្ឌិតណាម្នាក់ដោយគ្មានឆ្លងតាមសេចក្តីក្រាបបង្គំទូលថ្វាយពីបុរសខ្លាំងជានាយករដ្ឋមន្ត្រីនោះទេ ។
លើសពីនេះ មាត្រា៧៧នៃច្បាប់ស្តីពីពន្ធនាគារដែលប្រកាសឲ្យប្រើដោយព្រះរាជក្រមលេខនស/រកម/១២១១/០២១ ចុះថ្ងៃទី២១ ខែធ្នូ ឆ្នាំ២០១១ បានចែងថា "ក្នុងករណីចាំបាច់ ប្រមុខរាជរដ្ឋាភិបាលមានបុព្វសិទ្ធិធ្វើសំណើថ្វាយព្រះមហាក្សត្រសុំលើកលែងទោសឲ្យទណ្ឌិតនៅពេលណាក៏បាន" ។
អនុលោមតាមមាត្រា៧៧នៃច្បាប់ស្តីពីពន្ធនាគារ និងតាមរូបភាពជាក់ស្តែង បានបង្ហាញឲ្យឃើញថា ក្នុងរបបនៃព្រះរាជាណាចក្រកម្ពុជាទី២នេះ គឺការលើកលែងទោស និងការបន្ធូរបន្ថយទោសឲ្យទណ្ឌិតឋិតនៅលើអំណាចរបស់បុរសខ្លាំងជានាយករដ្ឋមន្ត្រីទាំងស្រុង ហើយអំណាចរបស់បុរសខ្លាំងនេះរឹតតែខ្លាំងក្លាថែមទៀតនៅពេលដែលព្រះរាជាណាចក្រកម្ពុជាទី២មិនទាន់មានច្បាប់ស្តីពីការលើកលែងទោសជាទូទៅឲ្យបានច្បាស់លាស់ ដូចរដ្ឋធម្មនុញ្ញជាច្បាប់កំពូលនៃព្រះរាជាណាចក្រកម្ពុជាបានចែង ។
ក្រុមអ្នកច្បាប់ឯករាជ្យនៅកម្ពុជាបានលើកឡើងថា ការណ៍ដែលច្បាប់ស្តីពីការលើកលែងទោសជាទូទៅមិនអាចចេញរួចអស់រយៈពេលជាង២០ឆ្នាំមកហើយនោះ គឺជាចេតនារបស់អ្នកកាន់កាប់អំណាចមិនចង់ឲ្យមានច្បាប់នេះទាន់ពេលវេលា ដើម្បីឲ្យបុរសខ្លាំងមានបុព្វសិទ្ធិពេញទីក្នុងការលើកលែងទោសឲ្យទណ្ឌិតគ្រប់ពេលវេលាដែលបុរសខ្លាំងចង់ ខណៈដែលរូបភាពនៃការបន្ធូរបន្ថយទោស និងការលើកលែងទោសបច្ចុប្បន្នមានបង្កប់ដោយអំពើពុករលួយ បក្ខពួកនិយម និងរើសអើងមិនអាចគ្រប់គ្រង និងត្រួតពិនិត្យបាន ។
មជ្ឈដ្ឋានអ្នករិះគន់មួយចំនួនបានបញ្ចេញទស្សនៈរបស់ខ្លួនថា របបព្រះរាជាណាចក្រកម្ពុជាទី២បច្ចុប្បន្ន គឺអំណាចនៃការដាក់ទោសលើមនុស្ស(យកតុលាការធ្វើជាខែល) និងអំណាចនៃការលើកលែងទោសមនុស្សស្រេចលើបុរសខ្លាំងតែម្នាក់ប៉ុណ្ណោះ ដូចពាក្យសាមញ្ញនិយាយថា "អ្នកចងក៏សម្តេចតេជោ រីឯអ្នកស្រាយក៏សម្តេចតេជោ" ៕
Source from: www.dtn7.com
Loading...
Post a Comment