គ្រួសារអ្នកដំណើរប្រកាសផ្តល់រង្វាន់៥លានដុល្លារដល់អ្នកផ្តល់ព័ត៌មានឈានទៅរកឃើញយន្តហោះម៉ាឡេស៊ីបាត់ខ្លួន
កាលពីថ្ងៃអាទិត្យ ទី០៨ ខែមិថុនា ឆ្នាំ២០១៤ ដែលជារយៈពេលគម្រប់៣ខែគត់នៃការបាត់ខ្លួនយន្តហោះដឹកអ្នកដំណើររបស់ក្រុមហ៊ុនអាកាសចរណ៍ម៉ាឡេស៊ីមួយគ្រឿង ប្រភេទ Boeing777-200 មានជើងហោះហើរ MH370 ផ្ទុកមនុស្សចំនួន២៣៩នាក់នោះ ក្រុមគ្រួសារសាច់ញាតិរបស់អ្នកដំណើររងគ្រោះ បានធ្វើការប្រកាសឲ្យដឹងថា នឹងផ្តល់រង្វាន់ចំនួន៥លានដុល្លារអាមេរិកដល់អ្នកទាំងឡាយណាដែលផ្តល់ព័ត៌មានឈានទៅរកឃើញយន្តហោះបាត់ខ្លួន ក្រោមគម្រោងមូលនិធិមួយឈ្មោះថា " Reward MH370" ។
គួររំលឹកជូនថា យន្តហោះដឹកអ្នកដំណើររបស់ក្រុមហ៊ុនអាកាសចរណ៍ម៉ាឡេស៊ីមួយគ្រឿង ប្រភេទ Boeing777-200 មានជើងហោះហើរ MH370 ចេញពីទីក្រុងគូឡាឡាំពួរ ប្រទេសម៉ាឡេស៊ី ឆ្ពោះទៅទីក្រុងប៉េកាំង ប្រទេសចិន ផ្ទុកមនុស្សសរុបចំនួន២៣៩នាក់(ទាំងអាកាសយានិក ទាំងអ្នកដំណើរ) ក្នុងនោះមានចំនួនប្រមាណ២ភាគ៣ជាជនជាតិចិន ព្រមទាំងផ្ទុកទំនិញមួយចំនួនទៀត ដូចជាអាគុយ និងផ្លែមង្ឃុត…បានបាត់ខ្លួនចេញពីរ៉ាដាត្រួតពិនិត្យនាថ្ងៃទី០៨ ខែមីនា ឆ្នាំ២០១៤កន្លងមក រកមិនទាន់ឃើញនៅឡើយទល់បច្ចុប្បន្ន ទោះបីមានប្រតិបត្តិការរុករកដោយទ្រង់ទ្រាយធំមានលក្ខណៈជាអន្តរជាតិក៏ដោយ ជាហេតុធ្វើឲ្យសាច់ញាតិអ្នកដំណើររងគ្រោះមួយចំនួនយល់ថា អាជ្ញាធរនៃបណ្តាប្រទេសពាក់ព័ន្ធអាចនាំគ្នាបិទបាំងការពិត ។
កាលពីរាត្រីថ្ងៃចន្ទ ទី២៤ ខែមីនា ឆ្នាំ២០១៤ លោក Najip Razak នាយករដ្ឋមន្ត្រីប្រទេសម៉ាឡេស៊ី បានថ្លែងឲ្យដឹងថា យន្តហោះមានជើងហោះហើរMH370 បនា្លក់ក្នុងសមុទ្រឥណ្ឌាភាគខាងត្បូង ដោយបានសម្លាប់មនុស្សក្នុងយន្តហោះទាំងអស់ ។ ជាមួយគ្នានេះ ក្រុមហ៊ុនអាកាសចរណ៍ម៉ាឡេស៊ីក៏បានផ្ញើសារសម្តែងការសោកស្តាយ និងត្រៀមផ្តល់ប្រាក់់សំណងមួយចំនួនជូនដល់សាច់ញាតិអ្នកដំណើររងគ្រោះផងដែរ ប៉ុន្តែក្រុមគ្រួសារអ្នកដំណើររងគ្រោះមិនអស់ចិត្តទាល់តែសោះ ទៅនឹងការប្រកាសអះអាងរបស់លោកនាយករដ្ឋមន្ត្រីម៉ាឡេស៊ី ព្រមទាំងបដិសេធមិនទទួលសំណងពីក្រុមហ៊ុនអាកាសចរណ៍ម៉ាឡេស៊ីថែមទៀត ដោយពួកគេចាត់ទុកថា ជាការប្រកាសគ្មានព័ស្តុតាងពិតប្រាកដអាចឲ្យជឿជាក់បាន ដ្បិតសាកសពក៏មិនឃើញ និងយន្តហោះក៏រកមិនឃើញ ។
លោក Ethan Hunt អ្នកទទួលខុសត្រូវនៃគម្រាងមូលនិធិឈ្មោះ "Reward MH370" បានបញ្ជាក់ថា "យើងជឿថា ពិតជាមាននរណាម្នាក់អាចដឹងពីរឿងរ៉ាវ ឬព័ត៌មានទាក់ទងនឹងយន្តហោះបាត់ខ្លួន ហើយយើងសង្ឃឹមថា ប្រាក់រង្វាន់នេះនឹងជំរុញឲ្យមានការបំបែកអាថ៌កំបាំង" ៕
Source from: www.dtn7.com
Loading...
Post a Comment