អាជ្ញាធរប្រកាសបង្ក្រាបទៅលើសកម្មភាពតវ៉ានៅមុខតុលាការសាលាដំបូងរាជធានីភ្នំពេញ
នៅថ្ងៃទី១៧ ខែកក្កដា ឆ្នាំ២០១៤នេះ សាលារាជធានីភ្នំពេញ បានចេញសេចក្តីប្រកាសបន្ទាន់មួយ ឲ្យក្រុមប្រជាពលរដ្ឋដែលកំពុងប្រមូលផ្តុំគ្នាតវ៉ាដោយប្រើប្រាស់សំឡេងរំខាននៅមុខអគាររបស់សាលាដំបូងរាជធានីភ្នំពេញ ត្រូវបញ្ឈប់ជាបន្ទាន់ក្នុងរយៈពេល២០នាទី បន្ទាប់ពីមានការជូនដំណឹងនេះ ហើយបើក្នុងករណីមិនបញ្ឈប់សកម្មភាពទេនោះ អ្នកប្រព្រឹត្តត្រូវទទួលទោសតាមច្បាប់ ។
សេចក្តីប្រកាសព័ត៌មានរបស់សាលារាជធានីភ្នំពេញ បានលើកឡើងថា "បើប្រជាពលរដ្ឋមានបំណងចង់តវ៉ាទៅលើកិច្ចការអ្វីមួយនោះ ត្រូវធ្វើទៅតាមនីតិវិធីនៃច្បាប់ដោយស្ងៀមស្ងាត់ និងមានរបៀបរៀបរយ ។ ការធ្វើសកម្មភាពស្រែកតាមឧគ្ឃោសនស័ព្ទបំពងសំឡេងបែបនេះ បានធ្វើឲ្យខូចសណ្តាប់ធ្នាប់សាធារណៈ និងរំខានដល់កិច្ចការងាររបស់ស្ថាប័នតុលាការ ។ ក្នុងករណីមិនបញ្ឈប់សកម្មភាព អ្នកប្រព្រឹត្តត្រូវទទួលទោសតាមច្បាប់" ។
គួរបញ្ជាក់ជូនដែរថា ចាប់តាំងពីព្រឹកព្រលឹមថ្ងៃទី១៧ ខែកក្កដា ឆ្នាំ២០១៤នេះ ក្រុមប្រជាពលរដ្ឋ សង្គមស៊ីវិល និងសកម្មជនគាំទ្រគណបក្សសង្គ្រោះជាតិ បានប្រមូលផ្តុំគ្នាលើកបដានៅក្បែរបរិវេណអគារសាលាដំបូងរាជធានីភ្នំពេញ ដើម្បីទាមទារឲ្យមានការដោះលែងបេក្ខជនតំណាងរាស្ត្រជាប់ឆ្នោតរបស់គណបក្សសង្គ្រោះជាតិចំនួន៥នាក់ និងថ្នាក់ដឹកនាំយុវជនរបស់គណបក្សសង្គ្រោះជាតិម្នាក់ទៀត ខណៈដែលកងកម្លាំងនគរបាល និងអាវុធហត្ថបង្ក្រាបបាតុកម្មប្រដាប់ដោយខែល និងដំបង បានបង្កើនចំនួន និងដាក់ពង្រាយត្រៀមបង្ក្រាបទៅលើអ្នកតវ៉ានៅមុខអគារសាលាដំបូងរាជធានីភ្នំពេញ នារសៀលថ្ងៃដដែលនេះ ។
ក្រោយមានការប្រកាសបន្ទាន់ដើម្បីបង្ក្រាបទៅលើសកម្មភាពការតវ៉ានៅមុខសាលាដំបូងរាជធានីភ្នំពេញដោយអាជ្ញាធរនោះ ក្រុមអ្នកតវ៉ាក៏បានបញ្ឈប់សកម្មភាពរបស់ខ្លួនភ្លាមៗដែរ ពោលគឺគ្មានការប៉ះទង្គិចណាមួយឡើយរវាងក្រុមអ្នកតវ៉ា និងកងកម្លាំងសមត្ថកិច្ច ៕
Source from: www.dtn7.com
Loading...
Post a Comment