យន្តហោះដឹកអ្នកដំណើរម៉ាឡេស៊ីជើងហោះហើរ MH17 ធ្លាក់នៅអ៊ុយក្រែនជាប់ព្រំដែនរុស្ស៊ីសម្លាប់មនុស្ស២៩៥នាក់
ទីភ្នាក់ងារសារព័ត៌មានរបស់អ៊ុយក្រែន បានរាយការណ៍ឲ្យដឹងថា យន្តហោះដឹកអ្នកដំណើររបស់ក្រុមហ៊ុនអាកាសចរណ៍ម៉ាឡេស៊ីមួយគ្រឿង ប្រភេទ Boeing 777 មានជើងហោះហើរ MH17 បានធ្លាក់នៅប្រទេសអ៊ុយក្រែន ជាប់ព្រំដែនប្រទេសរុស្ស៊ី នារាត្រីថ្ងៃទី១៧ ខែកក្កដា ឆ្នាំ២០១៤នេះ ដោយបានសម្លាប់មនុស្សទាំងអស់នៅក្នុងយន្តហោះចំនួន២៩៥នាក់ ដែលមានអ្នកដំណើរចំនួន២៨០នាក់ និងអាកាសយានិក ព្រមទាំងអ្នកបម្រើក្នុងយន្តហោះ ចំនួន១៥នាក់ផ្សេងទៀត ។
មូលហេតុពិតប្រាកដនៃការធ្លាក់យន្តហោះដឹកអ្នកដំណើរម៉ាឡេស៊ី នៅប្រទេសអ៊ុយក្រែននេះ មិនទាន់មានប្រភពជាក់លាក់ណាមួយបញ្ជាក់នៅឡើយ ប៉ុន្តែសេចក្តីរាយការណ៍ព័ត៌មានបឋម បានឲ្យដឹងថា បណ្តាលមកពីក្រុមឧទ្ទាមដែលគាំទ្រប្រទេសរុស្ស៊ី បាញ់ទម្លាក់ ខណៈយន្តហោះបានហោះហើរចេញពីទីក្រុង Amsterdam ប្រទេសហូល្លង់ឆ្ពោះមកទីក្រុងគូឡាឡំពួរ ប្រទេសម៉ាឡេស៊ី ហើយក៏បានដាច់ការទាក់ទងពីរ៉ាដាពេលយន្តហោះហោះហើរក្នុងរយៈកម្ពស់ប្រមាណ១០គីឡូម៉ែត្រ ។
នេះគឺជាសោកនាកម្មថ្មីមួយទៀតហើយ សម្រាប់ក្រុមហ៊ុនអាកាសចរណ៍ម៉ាឡេស៊ី ខណៈដែលយន្តហោះមានជើងហោះហើរ MH370ជាមួយនឹងមនុស្សចំនួន២៣៩នាក់បានបាត់ខ្លួន កាលពីថ្ងៃទី០៨ ខែមីនា ឆ្នាំ២០១៤កន្លងមក រកមិនទាន់ឃើញនៅឡើយ ដែលគេសន្និដ្ឋានថា មនុស្សទាំងអស់ក្នុងយន្តហោះបានស្លាប់បាត់បង់ជីវិតអស់ទៅហើយ ៕
Source from: www.dtn7.com
Loading...
Post a Comment