យន្តហោះស៊ើបការណ៍អាមេរិកគេចខ្លួនយ៉ាងប្រផិតប្រផើយពីយន្តហោះយោធារុស្ស៊ីធ្លាយចូលដែនអាកាសស៊ុយអ៊ែត
សារព័ត៌មាន CNN បានរាយការណ៍ឲ្យដឹងថា កាលពីថ្ងៃទី១៨ ខែកក្កដា ឆ្នាំ២០១៤កន្លងទៅ យន្តហោះស៊ើបការណ៍របស់យោធាអាមេរិកមួយគ្រឿង ប្រភេទ RC-125Five Joint បានហោះហើរគេចខ្លួនចេញពីយន្តហោះយោធារបស់រុស្ស៊ីយ៉ាងប្រផិតប្រផើយ ខណៈដែលយន្តហោះអាមេរិកមួយគ្រឿងនេះបានហោះហើរក្នុងដែនអាកាសអន្តរជាតិដើម្បីយកការណ៍ពីស្ថានការណ៍កងទ័ពរបស់រុស្ស៊ី ហើយត្រូវបានដឹងខ្លួនដោយយោធារុស្ស៊ី តាមរយៈប្រព័ន្ធរ៉ាដានៅលើដីដែលបានតាមដានដំណើរហោះហើររបស់យន្តហោះអាមេរិកនោះ ។
រឿងរ៉ាវយន្តហោះស៊ើបការណ៍របស់យោធាអាមេរិកហោះហើរគេចចេញពីយន្តហោះយោធារុស្ស៊ីនោះ គឺកើតឡើងក្រោយរយៈពេលតែមួយថ្ងៃនៃហេតុការណ៍ធ្លាក់យន្តហោះដឹកអ្នកដំណើររបស់ក្រុមហ៊ុនអាកាសចរណ៍ម៉ាឡេស៊ីមួយគ្រឿងប្រភេទ Boeing777-200 មានជើងហោះហើរ MH17 ចេញពីទីក្រុង Amsterdam ប្រទេសហូល្លង់ ឆ្ពោះទៅទីក្រុងគូឡាឡំពួរ ប្រទេសម៉ាឡេស៊ី ត្រូវបានបាញ់ទម្លាក់ដោយមីស៊ីលប្រភេទ Buk ចំនួន១គ្រាប់ សម្លាប់មនុស្សក្នុងយន្តហោះទាំងអស់ចំនួន២៩៨នាក់ កាលពីថ្ងៃទី១៧ ខែកក្កដា ឆ្នាំ២០១៤ ដែលសង្ស័យថា ជាអំពើរបស់ក្រុមឧទ្ទាមបំបែករដ្ឋពីអ៊ុយក្រែន គាំទ្រដោយរុស្ស៊ី នៅលើទឹកដីអ៊ុយក្រែនភាគខាងកើត ។
មន្ត្រីយោធាបាននិយាយឲ្យដឹងកាលពីថ្ងៃទី០២ ខែសីហា ឆ្នាំ២០១៤ថា យោធារុស្ស៊ីបានធ្វើការតាមដានទៅលើដំណើរហោះហើររបស់យន្តហោះស៊ើបការណ៍អាមេរិកជាមួយនឹងប្រព័ន្ធរ៉ាដាលើដី ហើយថែមទាំងបានបញ្ជូនយន្តហោះចម្បាំងមួយគ្រឿងដើម្បីចេញស្កាត់ផ្លូវយន្តហោះស៊ើបការណ៍របស់យោធាអាមេរិកនោះទៀតផង ជាហេតុធ្វើឲ្យអាកាសយានិកយន្តហោះអាមេរិកដឹងថា ខ្លួនកំពុងត្រូវគេតាមដាន ក៏បានព្យាយាមអស់ពីសមត្ថភាពហោះហើរគេចចេញពីតំបន់ដែនអាកាសខាងលើតាមដែលអាចធ្វើទៅបាន ចូលទៅក្នុងដែនអាកាសរបស់ប្រទេសស៊ុយអ៊ែត ដែលហេតុការណ៍នេះត្រូវបានរាយការណ៍ដំបូងភ្លាមៗដោយបណ្តាញសារព័ត៌មានស៊ុយអ៊ែត DN.se ។
ក្រសួងការបរទេសរបស់សហរដ្ឋអាមេរិកបានប្រកាសទទួលស្គាល់រួចហើយថា មានយន្តហោះអាមេរិកមួយគ្រឿងបានបើកចូលដែនអាកាសរបស់ប្រទេសស៊ុយអ៊ែត ហើយអាមេរិកនឹងចាត់វិធានការនានាដើម្បីធានាថា អាមេរិកទាក់ទងឲ្យបានត្រឹមត្រូវជាមួយអាជ្ញាធរស៊ុយអ៊ែតជាមុន ។
សូមរំលឹកជូនដែរថា កាលពីថ្ងៃទី២៣ ខែមេសា ឆ្នាំ២០១៤កន្លងទី យន្តហោះចម្បាំងរបស់រុស្ស៊ីធុន Su-27 Flanker ហោះហើរយ៉ាងកៀកជាមួយនឹងយន្តហោះស៊ើបការណ៍ប្រភេទ RC-135U របស់យោធាអាមេរិក ហើយប៊ិះនឹងបុកគ្នានៅលើដែនអាកាសតំបន់សមុទ្រ Okhotsk ឋិតក្នុងចន្លោះប្រទេសរុស្ស៊ី និងប្រទេសជប៉ុន ។ នេះគឺជាលើកទី២ហើយដែលយន្តហោះស៊ើបការណ៍របស់យោធាអាមេរិកជួបបញ្ហាជាមួយយន្តហោះចម្បាំងរុស្ស៊ី នៅក្រោយពេលយន្តហោះម៉ាឡេស៊ីមានជើងហោះហើរ MH17 បានធ្លាក់ដោយសារត្រូវគ្រាប់មីស៊ីល សង្ស័យជារបស់រុស្ស៊ី នៅលើទឹកដីប្រទេសអ៊ុយក្រែនភាគខាងកើតសម្លាប់មនុស្សអស់ចំនួន២៩៨នាក់យ៉ាងអាណោចអាធ័ម ៕
Source from: www.dtn7.com
Loading...
Post a Comment